Аляскінскі хрыбет

Горныя пікі Аляскінскага хрыбта. Недалёка ад трасы Анкарыдж - Фэрбанкс

Аляскінскі хрыбет (англ.: Alaska Range) - адносна вузкі горны хрыбет на поўдні Аляскі, у Ціхаакіянскім поясе Кардыльераў Паўночнай Амерыкі (ЗША). Даўжыня каля 1000 км. Сярэдняя вышыня каля 3000 м, найбольшая - 6191 м (гара Мак-Кінлі, самая высокая вяршыня Паўночнай Амерыкі).

Геаграфія

Хрыбет распасціраецца ад возера Кларк на паўднёва-захадзе да ракі Белай на канадскай тэрыторыі Юкан на паўднёвым усходзе. З'яўляецца часткай Ціхаакіянскага вулканічнага кальца і Дэналійскага разлому, які праходзіць уздоўж паўднёвага краю хрыбта. У самым хрыбце вулканаў няма.

Аляскінскі хрыбет - важны клімата- і водападзел. На паўднёвых увільготненых схілах да вышыні 800 м яловыя лясы, вышэй - вечныя снягі, буйныя ледавікі; на паўночных больш сухіх схілах мяжа лесу павышаецца да 1000-1200 м, вышэй - горныя тундры.

Восевая частка хрыбта складзена з інтрузіўных (пераважна гранадыярытаў), па краях - з асадкавых парод. Схілы стромкія, моцна расчлянёныя.

Самыя высокія вяршыні

Гара Мак-Кінлі ў сонечны дзень

Ледавік на Аляскінскім хрыбце

Мак-Кінлі — вышыня 6194 м

Фаракер - 5304 м

Хантэр - 4442 м

Хэйес - 4216 м

Сільвертроун - 4029 м

Дебара - 3761 м

Хангінгтан - 3730 м

Расэл - 3557 м

Этымалогія назвы

Назва «Аляскінскі хрыбет» упершыню была ўжыта ў 1869 годзе натуралістам Далам (англ.: W.H. Dall).

Літаратура

• Беларуская энцыклапедыя: У 18 т. Т.1: А - Аршын / Рэдкал.: Г.П.Пашкоў і інш. - Мн.: БелЭн, 1996. - 552 с.: іл.

Спасылкі

• Аляскінскі хрыбет
• Peakware.com