Андрэ Маруа

Андрэ Маруа
André Maurois
Імя пры нараджэнні:	Эміль Эрзог Emil Herzog
Дата нараджэння:	26 ліпеня 1885(1885-07-26)
Месца нараджэння:	Эльбёф каля Руана Францыя
Дата смерці:	9 кастрычніка 1967(1967-10-09) (82 года)
Месца смерці:	Нёі-сюр-Сен Парыж
Грамадзянства:	Францыя
Род дзейнасці:	пісьменнік

Андрэ МАРУА (André Maurois; сапр. Эміль Эрзог, Émile Herzog; 26 ліпеня 1885, г. Эльбёф, Францыя — 9 кастрычніка 1967) — французскі пісьменнік.

Біяграфічныя звесткі

Скончыў Руанскі ліцэй. Член Французскай акадэміі (з 1938).

Творчасць

Першыя раманы «Маўклівы палкоўнік Брамбл» (1918), «Гаваркі доктар О'Грэдзі» (1922). Аўгар псіхалагічных раманаў «Бернар Кенэ» (1926), «Зменлівасць кахання» (1928), «Зямля запаветная» (1945), зборніка навел «Лісты да незнаёмкі» (1953) і інш., эсэ, гістарчных і літаратуразнаўчых прац, кнігі «Мемуары» (апубл. 1970).

Майстар жанру т.зв. раманізаванай біяграфіі («Арыэль, або Жыццё Шэлі», 1923; «Байран», 1930; «Лелія, або Жыццё Жорж Санд», 1952; «Алімпіо, або Жыццё Віктора Гюго», 1954; «Тры Дзюма», 1957; «Праметэй, або Жыццё Бальзака», 1965, і інш.). У жыццеапісаннях вялікіх людзей асноўным лічыў складанасць і супярэчлівасць асобы, цікавасць да яе ўнутранага свету, смелы пошук праўды.

Яго творчасць і тэарэтычныя погляды спрыялі пераадоленню ўсталяванага схематычнага падыходу да адлюстравання героя і метадаў стварэння яго вобраза. Зрабіў вялікі ўклад у развіццё біяграфічнага жанру ХХ ст., садзейнічаў нараджэнню «новай біяграфіі» ў канцы 1920-х г.

На беларускую мову асобныя навелы А. Маруа пераклалі Ю. Гаўрук, Л. Казыра, Г. Скрыган.

Беларускія пераклады

• Падарожжа ў нябьгт і яшчэ 24 навелы. Мн., 1974;
• Навелы. Мн., 1996.

Літаратура

• Камароўская Т. Маруа // БЭ ў 18 т. Т. 10. Мн., 2000.