Беларуская сацыялагічная асацыяцыя

Белару́ская сацыялагі́чная асацыя́цыя — добраахвотная навукова-грамадская арганізацыя, якая аб’ядноўвае вучоных і спецыялістаў, што працуюць у галіне сацыялогіі. Створана ў 1994 годзе, з’яўляецца правапераемніцай Беларускага аддзялення Савецкай сацыялагічнай асацыяцыі. Асноўныя задачы: павышэнне прафесійнага ўзроўню членаў асацыяцыі, пашырэнню сацыялагічных ведаў; садзейнічанне развіццю сацыялагічнай навукі, павышэнню абгрунтаванасці і дзейнасці яе рэкамендацый; выяўленне прыярытэтных кірункаў сацыяльна-эканамічнага, палітычнага і культурнага развіцця Беларусі і асобных яе рэгіёнаў; развіццё навуковых сувязяў і супрацоўніцтва з сацыёлагамі іншых краін і міжнароднымі навуковымі арганізацыямі; арганізацыя і правядзенне навуковых кангрэсаў, канферэнцый, сімпозіумаў, семінараў; выдавецкая дзейнасць. У рамках Беларускай сацыялагічнай асацыяцыі вядзецца экспертна-кансультацыйная дзейнасць па пытаннях сацыялогіі, праводзяцца сацыялагічная экспертызы палітычных, прававых, эканамічных, тэхнічных і іншых праектаў. Разам з іншымі навуковымі ўстановамі і арганізацыямі выдала манаграфіі А. У. Рубанава «Сацыяльны суб’ект: матывы і дзейнасць» (1994), Г. М. Сакаловай «Эканамічная сацыялогія», Я. М. Бабосава «Катастрофы: сацыялагічны аналіз» (1995) і іншае.

Літаратура

• В. А. Кліменка. Беларуская сацыялагічная асацыяцыя // Беларуская энцыклапедыя: У 18 т. Т. 2: Аршыца — Беларусцы / Рэдкал.: Г. П. Пашкоў і інш. — Мн. : БелЭн, 1996. — Т. 2. — 480 с. — 10 000 экз. — ISBN 985-11-0035-8. — ISBN 985-11-0061-7 (т. 2).. — С. 426.