Беларусь на зімовых Алімпійскіх гульнях 2010 года была прадстаўлена ў 4 відах спорту. Усяго краіну прадстаўляла 47 спартсменаў (33 мужчыны і 14 жанчын). Сцяг Беларусі на цырымоніі адкрыцця пранёс 38-гадовы хакеіст Алег Антоненка (цікава, што пры гэтым Антоненка не быў у Ванкуверы ні капітанам, ні альтэрнатыўным капітанам зборнай па хакеі з шайбай).
Аляксей Грышын, перамогшы ў лыжнай акрабатыцы, прынёс Беларусі першы ў гісторыі залаты медаль на зімовых Алімпійскіх гульнях. Яшчэ два медалі ў «скарбонку» беларусаў дадалі біятланісты: Сяргей Новікаў нечакана выйграў срэбра ў індывідуальнай гонцы на 20 км (падзяліўшы яго са знакамітым нарвежцам Уле-Эйнарам Б'ёрндаленам), а Дар’я Домрачава стала трэцяй у жаночай індывідуальнай гонцы на 15 км. Таксама можна адзначыць 4-е месца Асолі Слівец у жаночай лыжнай акрабатыцы. Беларусы ўпершыню ў гісторыі зімовых Алімпіяд выйгралі 3 медалі - раней яны ніколі не заваёўвалі больш за два. Акрамя таго, Беларусь стала адзінай, акрамя Расіі, краінай былога СССР, якая выйграла ў Ванкуверы хоць бы адно золата.