Рота (востраў)

Рота
	англ. Rota, чамор. Luta
	; Выгляд з космасу
Характарыстыкі
Плошча	85,38 км²
Найвышэйшы пункт	495 м
Насельніцтва	2 527 чал. (2010)
Шчыльнасць насельніцтва	29,6 чал./км²
Размяшчэнне
	14°09′13″ пн. ш. 145°12′11″ у. д.HGЯO
Архіпелаг	Марыянскія астравы
Акваторыя	Ціхі акіян
Краіна	Паўночныя Марыянскія астравы;
	Рота
Медыяфайлы на Вікісховішчы

Рота (англ. Rota, на мове чамора Luta) — востраў у складзе Марыянскіх астравоў. Частка тэрыторыі Паўночныя Марыянскія астравы. Плошча — 85,38 км². Насельніцтва — 2527 чал. (2010 г.).

Гісторыя[правіць | правіць зыходнік]

Востраў Рота быў населены каля 3000 гадоў таму продкамі чамора. Ад іх засталіся апрацаваныя камяні тага або латэ, якія ў нашы дні ўяўляюць археалагічную каштоўнасць.

У 1521 г. востраў быў адкрыты Фернанам Магеланам і далучаны да Іспаніі. У канцы XVII ст. іспанцы перасялілі карэннае насельніцтва на суседні Гуам. У XIX ст. Роту зноў насялілі рэфалуваш з Каралінскіх астравоў.

У 1899—1914 гг. належаў Германіі.

У 1914—1944 гг. кантраляваўся ўрадам Японіі. Для развіцця сельскай гаспадаркі (вырошчванне цукровага трыснягу, бавоўны і какосаў) і прамысловасці японцы спрыялі іміграцыі рабочых з Карэі і Японіі. У гады II сусветнай вайны была створана ваенная база, якая здалася амерыканцам толькі 2 верасня 1945 г. На той момант на востраве знаходзілася 2665 японскіх салдат, 6581 перасяленец з Японіі, 181 карэец і 790 тубыльцаў. Мірнае насельніцтва хавалася ў пячорах ад бамбардзіровак.

Пасля заканчэння вайны востраў кантраляваўся ЗША. У 1978 г. увайшоў у склад Садружнасці Паўночныя Марыянскія Астравы.

Прырода[правіць | правіць зыходнік]

Востраў Рота мае часткова вулканічнае, часткова каралавае паходжанне. Горны масіў складзены вапнякамі. Найвышэйшая кропка — гара Сабана (495 м). З-за сталых вадацёкаў у карсце ўтварыліся шматлікія малыя пячоры. Берагавая лінія цягнецца на 62 км.

Клімат трапічны пасатны, вельмі вільготны. На працягу года сярэдняя тэмпература вагаецца ад 27° да 31° С.

Рота значна меней асвоена чалавекам, чым суседнія астравы, таму тут захаваліся лясы, шмат птушак, у тым ліку эндэмічных.

Інфраструктура[правіць | правіць зыходнік]

Большасць насельніцтва (2527 чал. у 2010 г.) жыве ў паселішчах Сансонг і Сінапалу. Аснова мясцовай эканомікі — турызм. Рота прыцягвае да сябе дайвераў і прыхільнікаў экалагічнага адпачынку. Сельская гаспадарка і лоў рыбы маюць дадатковае значэнне і не задавальняюць патрэб нават саміх астравіцян. На востраве маецца аэрапорт. Працуюць 2 дзяржаўныя і 2 прыватныя школы.