Гаць (Акцябрскі раён)

Вёска Гаць Краіна Беларусь Вобласць Гомельская Раён Акцябрскі Сельсавет Ламавіцкі Каардынаты 52°36′15″ пн. ш. 28°57′49″ у. д. Першая згадка XV стагоддзе Колькасць двароў 169 Насельніцтва 414 чалавек (2011) Часавы пояс UTC+3 Тэлефонны код +375 2357 Паштовы індэкс 247301 Аўтамабільны код 3 СААТА 3240808016 Гаць на карце Беларусі ±

Гаць (трансліт.: Hać, руск.: Гать) — вёска ў Акцябрскім раёне Гомельскай вобласці. Уваходзіць у склад Ламавіцкага сельсавета.

Геаграфія

Размяшчэнне

У 8 км на паўднёвы ўсход ад гарадскога пасёлка Акцябрскі, 212 км ад Гомеля, 12 км ад чыгуначнай станцыі Рабкор, размешчанай на чыгунцы Бабруйск — Рабкор, адгалінаванні лініі Асіповічы — Жлобін.

Гідраграфія

На ўсходзе і поўдні меліярацыйныя каналы.

Транспартная сетка

На аўтамабільнай дарозе Акцябрскі — Азарычы.

Інфармацыя

Планіроўка складаецца з просталінейнай вуліцы, арыентаванай з паўднёвага захаду на паўночны ўсход і забудаванай драўлянымі сядзібамі. У 1991-92 гадах пабудавана 50 цагляных хат, у якіх змесцаваліся перасяленцы з забруджаных радыяцыяй у выніку аварыі на Чарнобыльскай АЭС месцаў. У складзе сельскагаспадарчага ДП «Ламавічы» з цэнтрам у аднайменнай вёсцы, жывёлагадоўчы комплекс, механічны парк. Сярэдняя школа (у 1995 годзе пабудаваны новы цагляны будынак), дзіцячы сад, Дом культуры, бібліятэка, фельчарска-акушэрскі пункт, аддзяленне сувязі, сталовая, 2 крамы.

Гісторыя

Па пісьмовых крыніцах вядомая з XV стагоддзя як паселішча ў Мазырскім павеце Мінскага ваяводства Вялікага княства Літоўскага. Згадваецца ў Літоўскай метрыцы пад 1495 годам.

Пасля другога падзелу Рэчы Паспалітай (1793 год) у складзе Расійскай імперыі. З пачатку XIX стагоддзя ў складзе маёнтка Рудабелка, з 1867 года належала барону А. Я. Урангелю, з 1874 года — генерал-маёру О. Ф. Ліліенфельду. Па стану на канец 60-х — пачатак 70-х гадоў XIX ст. у вёсцы жыло 40 асоб мужчынскага полу і 44 — жаночага. Пазначана на карце 1866 года, якая выкарыстоўвалася Заходняй меліярацыйнай экспедыцыяй, што працавала ў гэтым раёне ў 1890-я гады. На 1908 год у Рудабельскай воласці Бабруйскага павета Мінскай губерні.

У 1919 ці 1921 годзе адкрыта школа, для якой у 1922 годзе вылучана 2 дзесяціны зямлі. У 1929 годзе арганізаваны калгас «Чырвоны партызан», з 1934 года працавала гамарня. Пачатковая школа ў 1930-я гады ператворана ў сямігадовую. Падчас Вялікай Айчыннай вайны партызаны разграмілі апорны пункт, створаны нямецкімі акупантамі, у красавіку 1942 года карнікі спалілі 9 двароў і забілі 9 жыхароў. 41 жыхар загінуў на фронце. З 20 жніўня 1924 года да 16 ліпеня 1954 года цэнтр Гацкага сельсавета Глускага раёна, з 28 чэрвеня 1939 года — Акцябрскага раёна Палескай, з 20 верасня 1944 года — Бабруйскай, з 8 студзеня 1954 года — Гомельскай абласцей.

Насельніцтва

Колькасць

• 2011 год — 169 гаспадарак, 414 жыхароў.

Дынаміка

• 1897 год — 30 двароў, 115 жыхароў (паводле перапісу).
• 1908 год — 39 двароў.
• 1924 год — 276 жыхароў.
• 1940 год — 48 двароў.
• 1959 год — 255 жыхароў (паводле перапісу).
• 1997 год — 219 двароў, 582 жыхары.
• 2004 год — 188 гаспадарак, 453 жыхары.

Літаратура

• Гарады і вёскі Беларусі: Энцыклапедыя. Т.1, кн.1. Гомельская вобласць/С. В. Марцэлеў; Рэдкалегія: Г. П. Пашкоў (галоўны рэдактар) і інш. — Мн.: БелЭн, 2004. 632с.: іл. Тыраж 4000 экз. ISBN 985-11-0303-9 ISBN 985-11-0302-0
• Памяць: Гіст.-дакум. хроніка Акцябрскага р-на. — Мн.: БЕЛТА, 1997. — 478 с. ISBN 985-6302-03-X

Спасылкі

• На Вікісховішчы пакуль няма медыяфайлаў па тэме, але Вы можаце загрузіць іх