Віктар Давыдавіч Купрэйчык

З Вікіпедыі, свабоднай энцыклапедыі
(Пасля перасылкі з Віктар Купрэйчык)
У Вікіпедыі ёсць артыкулы пра іншых асоб з прозвішчам Купрэйчык.
Віктар Давыдавіч Купрэйчык
Краіны: СССР
Беларусь
Дата нараджэння: 3 ліпеня 1949(1949-07-03)
Месца нараджэння:
Дата смерці: 22 мая 2017(2017-05-22) (67 гадоў)
Месца смерці:
Званне:

Гросмайстар (1980)
Міжнародны майстар (1977)


Майстар спорту СССР (1965)
Актуальны рэйтынг: 2 370 (май 2017)[1]
Лагатып Вікісховішча Медыяфайлы на Вікісховішчы

Віктар Давыдавіч Купрэйчык (3 ліпеня 1949, Мінск — 22 мая 2017, Мінск) — беларускі шахматыст, гросмайстар (1980).

Біяграфія[правіць | правіць зыходнік]

Журналіст. У складзе студэнцкай зборнай каманды СССР пераможца чэмпіянатаў свету 1968, 1969 і 1974. Некаторы час быў наймаладзейшым шахматным майстрам у СССР, у гэтым статусе выйграў адкрытае першынство спартовага таварыства «Спартак» (Мінск, 1966)[2]. Чэмпіён Беларусі (1972, 2003). Пераможца Усесаюзнага турніру маладых майстроў (1970 і 1974). Удзельнік васьмі чэмпіянатаў СССР (1969—1987); лепшыя вынікі: 1979 — 5-7-е; 1980/1981 — 6-9-е; 1987 — 8-11-е месцы.

Паспяхова выступіў у шэрагу буйных міжнародных спаборніцтваў: Рыга (1967, юнацкі турнір) — 2-е; Тршынец (1967) і Сомбар (1970) — 2-3-е; Дортмунд (1975) — 6-7-е; Вейк-ан-Зее (1977, пабочны турнір) — 1-е; Кіравакан (1978) — 1-2-е; Рэйк’явік і Медына-дэль-Кампа (1980) — 1-е; Гасцінгс (1981/1982) — 1-е; Мінск (1982) — 4-6-е; Нью-Дэлі (1982) — 2-е; Барселона (1984) — 2-3-е; Зрэнка (1985) — 1-е; Львоў (1986) — 5-е; Вініпег (1986, 52 удзельніка) — 1-2-е; Заходні Берлін (1987) — 2-8-е; Мальмё (1987/1988) — 1-2-е месцы.

Займаўся шахматамі з 1959 года ў шахматнай секцыі Мінскага палаца піянераў, у майстра спорту Абы Шагаловіча. Шасцікласнікам, ва ўзросце 12 гадоў, удзельнічаў у чэмпіянаце Мінска сярод дарослых, быў чэмпіёнам Беларусі сярод школьнікаў[3]. У 2003 годзе В. Купрэйчык казаў, што «вучыўся розуму» ў Гаўрылы Верасава і Ісака Баляслаўскага, захапляўся партыямі Міхаіла Таля[4]. Вядомы шахматны трэнер Ю. Муйвід параўноўвае востракамбінацыйны стыль юнага Купрэйчыка з талеўскім[3].

В. Купрэйчык паспяхова праявіў сябе як трэнер і арганізатар: так, у 1980-х гадах ён быў секундантам гросмайстра Васіля Смыслова[4], у 2010-х даваў урокі шахмат у мінскай СДЮШАР-11[5], працаваў з таленавітымі юнакамі індывідуальна. Сярод яго вучняў — міжнародны гросмайстар Уладзімір Раманенка, міжнародны майстар Міхаіл Нікіценка[3]. У савецкі час В. Купрэйчык загадваў шахматным аддзелам у газеце «Знамя юности»[3], вёў тэлеперадачы для шахматыстаў на БТ. Браў удзел у выданні шахматнай літаратуры ў Беларусі; рэцэнзаваў кнігі[4], выступіў у якасці сааўтара зборнікаў «Г. Н. Вересов» (2002, разам з Э. Калеснікам і Я. Мачалавым), «120 лучших комбинаций Г. Н. Вересова» (2004, разам з М. Царанковым) і інш.

Гросмайстар Купрэйчык вядомы таксама тым, што ў 1997 годзе, як дэлегат Алімпійскага сходу, прагаласаваў супраць абрання А. Р. Лукашэнкі прэзідэнтам Нацыянальнага алімпійскага камітэта[6]. У 2003 годзе В. Купрэйчык быў намеснікам старшыні Беларускай федэрацыі шахмат (БФШ), старшынёй камісіі БФШ па этыцы[4]. У 2010 годзе з’яўляўся прадстаўніком грамадзянскай кампаніі «Гавары праўду»[7].

У 2013 годзе імя гросмайстра Купрэйчыка было занесена ў Залу славы ФІДЭ. У 2014 годзе В. Купрэйчык заняў 3-е месца ў чэмпіянаце свету сярод сеньёраў (у катэгорыі шахматыстаў, старэйшых за 65 гадоў), які праходзіў у Грэцыі.

Зноскі

  1. ↑ FIDE Ratings and Statistics Праверана 28 мая 2017.
  2. ↑ https://belisrael.info/?p=28796
  3. ↑ а б в г http://belisrael.info/?p=11031
  4. ↑ а б в г http://belisrael.info/?p=11020
  5. ↑ Архіўная копія(недаступная спасылка). Архівавана з першакрыніцы 17 лістапада 2019. Праверана 23 мая 2017.
  6. ↑ https://www.svaboda.org/a/28502157.html
  7. ↑ О проекте | Говори правду!(недаступная спасылка) (руск.)

Спасылкі[правіць | правіць зыходнік]

Узята з "https://be.wikipedia.org/w/index.php?title=Віктар_Давыдавіч_Купрэйчык&oldid=4625459"