З пляцоўкі Вікіпедыя.
Ліпа (Tilia) — род лістападных дрэў сямейства ліпавых.
Дрэвы вышынёй да 15-20 м (часам да 40 м), дыяметрам да 2 м. Лісце нераўнабокае, круглавата-сэрцападобнае, завостранае, пілаватае. Кветкі жоўтыя, або жоўта-белыя, духмяныя, у паўпарасоніках. Плод — арэшак. Садовыя формы адрозніваюцца сілуэтам кроны, афарбоўкай лісця і кветак.
Цене-, мароза- і ветраўстойлівае дрэва. Жыве 300—400 гадоў.
Ліпа драбналістая (Tilia cordata) пашырана на ўсёй тэрыторыі Беларусі ў шыракалістых лясах. У садах і парках каля 30 інтрадукаваных відаў, разнавіднасцей і форм, у тым ліку: ліпа раскідзістая, амерыканская, амурская, лямцавая, еўрапейская, крымская, буйналістая. Цвітуць ліпы ў чэрвені-жніўні.
Кветкі меданосныя, ліпавы цвет ужываецца як лекавы сродак. Ліпа — каштоўнае дрэва, якое выкарыстоўваецца для азелянення.
Зноскі
- ↑ Выкарыстоўваецца таксама назва Пакрытанасенныя.
- ↑ Пра ўмоўнасць аднясення апісанай у гэтым артыкуле групы раслін да класа двухдольных гл. раздзел «Сістэмы APG» артыкула «Двухдольныя».
- ↑ Tilia// NCU-3e. Names in current use for extant plant genera Electronic version 1.0 (Праверана 6 студзеня 2011)
