Мухамад Аль-Харэзмі

Мухамед ібн Муса Харэзмі
محمد بن موسى الخوارزمي
Паштовая марка СССР, 1983.
Дата нараджэння:	каля 783
Дата смерці:	каля 850
Вядомы як:	Аль-Харэзмі

Мухамад ібн Муса Харэзмі (перс. محمد بن موسی خوارزمی, Mohammad ebne Mūsā Khwārazmī, Харэзм, каля 783 — каля 850), вялікі персідскі матэматык, астраном і географ, заснавальнік класічнай алгебры.

Звестак аб жыцці аль-Харэзмі захавалася не многа. Значны перыяд свайго жыцця ён правёў у Багдадзе, узначальваючы пры халіфе аль-Мамуне (813—833) бібліятэку «Дома мудрасці». У 827 прымаў удзел у вымярэнні даўжыні градуса зямнога мерыдыяна на раўніне Сінджара. Пры халіфе аль-Васіку (842—847) узначальваў экспедыцыю да хазараў. Апошняе ўпамінанне аб ім датуецца 847 годам.

Аўтар кнігі «Аб індыйскім злічэнні», якая паспрыяла папулярызацыі дзесятковай пазіцыйнай сістэмы запісу лікаў ва ўсім Халіфаце. У 12 стагоддзі яна была перакладзена на лацінскую мову і адыграла вялікую ролю ў развіцці еўрапейскай арыфметыкі і ўкараненні інда-арабскіх лічбаў. Імя аўтара ў лацінізаванай форме (Algorismus, Algorithmus) стала абазначаць ва ўсёй сярэднявечнай Еўропе ўсю сістэму дзесятковай арыфметыкі. Адсюль бярэ пачатак сучасны тэрмін алгарытм, упершыню выкарыстаны Лейбніцам.