Плімуцкая кампанія

Карта тэрыторый, правы на якія Якаў I перадаў Вірджынскай кампаніі. Поўпхэм пазначаны як «Po».

Плімуцкая кампанія — англійскае акцыянернае таварыства, заснаванае ў 1606 годзе Якавам I для каланізацыі ўзбярэжжа Паўночнай Амерыкі. Адначасова з Плімуцкай кампаніяй для гэтай жа мэты была заснавана Лонданская кампанія, а абедзве яны ўваходзілі ў аб'яднанне, званае Вірджынскай кампаніяй, створанай на ўзор Таварыства купцоў-шукальнікаў.

Кампанія атрымала правы на тэрыторыю атлантычнага ўзбярэжжа Паўночнай Амерыкі паміж 38 і 45 паралелямі, што прыкладна адпавядае ўчастку ад Чэсапікскага заліва да сучаснай амерыкана-канадскай мяжы. Пры гэтым участак паміж 38 і 41 паралелямі быў агульным для дзвюх кампаній, пры ўмове, што пры будаўніцтве новага паселішча будзе вытрымлівацца адлегласць не менш за 100 міль да калоній кампаніі-канкурэнта.

У 1607 годзе была заснавана калонія Поўпхэм у вусці ракі Кенебек (у наш час гэта тэрыторыя штата Мейн). У гэтым жа годзе Лонданская кампанія заснавала калонію Джэймстаўн, аднак у адрозненне ад апошняй, Поўпхэм праіснаваў усяго год.

У 1609 годзе Плімуцкая кампанія спыніла існаванне, а большая частка яе земляў была перададзена Лонданскай кампаніі, аднак праз 11 гадоў яна адрадзілася як Плімуцкі савет па справах Новай Англіі.

Спасылкі

• Library of Congress: Evolution of the Virginia Colony, 1610—1630
• First Charter of Virginia — April 10, 1606 O.S.; Julian Calendar (from Julius Caesar time) or April 1, 1606 N.S.; Gregorian Calendar (Current Civil Calendar.)