Цела даўжынёй 14-20 мм, шырынёй 7-10 мм. Верх умерана пукаты, зялёны, з металічным бляскам, надкрылы з нешматлікімі белымі плямамі, ніз з медна-чырвоным адлівам. Часам увесь верх медна-чырвоны, або з зялёнымі надкрыламі, пярэдняспінка медна-чырвоная.
Пашыраны ў Еўропе. Знаходзіцца ў Беларусі на ўсходняй ускраіне арэала віду. Месцы пражывання: старыя шыракалістыя, асабліва дубовыя лясы. Жукі часцей трапляюцца на лясных палянах.
Цыкл развіцця аднагадовы. Лічынкі развіваюцца ў спарахнелай драўніне старых дубоў, таполяў, вербаў, фруктовых дрэў. Зімуюць лічынкі, вясной акукліваюцца, у чэрвені выходзяць жукі. Імага выядаюць пыльнікі кветак бузіны.
Чырвоная кніга Рэспублікі Беларусь: Рэдкія і тыя, што знаходзяцца пад пагрозай знікнення віды жывёл і раслін. — Мн.: Беларуская Энцыклапедыя, 1993. ISBN 5-85700-095-5