Юлія Цімашэнка
Ю́лія Уладзі́міраўна Цімашэ́нка (укр.: Юлія Володимирівна Тимошенко; прозвішча пры нараджэнні Грыгян, потым зменена на прозвішча маці Цялегіна, 27 лістапада 1960 года, Днепрапятроўск) — украінскі палітык, лідар палітычнага руху «Батьківщина» і БЮЦ (Блок Юліі Цімашэнка), адна з лідараў «Аранжавай рэвалюцыі». Прэм'ер-міністр Украіны ў 2005 і з 18 снежня 2007 па 3 сакавіка 2010.
Біяграфічны нарыс [правіць]
Юлія Цімашэнка нарадзілась у Днепрапятроўску (Украіна), у 1984 скончыла эканамічны факультэт мясцовага ўніверсітэта.
На пачатку 1990-х гг. Юлія Цімашэнка занялася бізнэсам. Кіраваная ёй сетка кампаній «Аб'яднаныя энергасістэмы Украіны» (асноўны імпарцёр газу з Расіі ва Украіну) стала адной з буйнейшых украінскіх кампаній.
У 1999 Юлія Цімашэнка стала віцэ-прэм'ерам ва ўрадзе Віктара Юшчанкі. Пасля адстаўкі ўраду была абвінавачана ў карупцыі, трапіла ў турму, дзе правяла некалькі тыдняў. У хуткім часе праявіла сябе як самастойны палітык: у 2002 «Блок Юліі Цімашэнка» падчас парламенцкіх выбараў атрымаў 7,2%, а сама яна стала адным з самых рэзкіх і радыкальных крытыкаў прэзідэнта Леаніда Кучмы.
Юлія Цімашэнка была асноўнай паплечніцай Віктара Юшчанкі на прэзідэнцкіх выбарах ва Украіне ў 2004, адным з лідараў «Аранжавай рэвалюцыі», пасля якой Юшчанка стаў прэзідэнтам Украіны.
У студзені 2005 В. Юшчанка прызначыў Ю. Цімашэнка прэм'ер-міністрам, але затым у верасні 2005 зняў яе з гэтай пасады. Пасля наступных парламенцкіх выбараў, на якіх БЮЦ атрымаў 30,7% галасоў, Юлія Цімашэнка з 18 снежня 2007 ізноў заняла пасаду прэм'ер-міністра Украіны.
Кандыдат на пасаду прэзідэнта Украіны на выбарах 2010, выйшла ў другі тур выбараў (7 лютага), дзе саступіла Віктару Януковічу. 3 сакавіка 2010 пайшла ў адстаўку з пасады прэм'ер-міністра.
5.8.2011 арыштаваная, 11.11.2011 прызнана вінаватай у перавышэнні службовых паўнамоцтваў і асуджана да 7 гадоў пазбаўлення волі.
Спасылкі [правіць]
На ВікіСховішчы ёсць медыяфайлы па тэме Юлія Цімашэнка- Афіцыйная старонка (укр.)
- Сайт Блоку Юліі Цімашэнка (укр.)
