Ібрагім Рафаілавіч Гембіцкі

Ібрагім Рафаілавіч Гембіцкі
Дата нараджэння	17 кастрычніка 1900(1900-10-17)
Месца нараджэння	Мінск, Мінскі павет, Мінская губерня, Расійская імперыя
Дата смерці	1 студзеня 1974(1974-01-01) (73 гады)
Месца смерці	Мінск, Беларуская ССР, СССР
Месца пахавання	Чыжоўскія могілкі
Грамадзянства	Расійская імперыя  Беларуская ССР  СССР
Род дзейнасці	мастак, графік, ілюстратар
Вучоба	Маскоўскі дзяржаўны акадэмічны мастацкі інстытут імя В. І. Сурыкава[d] (1938)
Член у	Саюз мастакоў БССР

Ібрагім Рафаілавіч Гембіцкі (4 (17) кастрычніка 1900, Мінск — 1 студзеня 1974) — беларускі графік.

Біяграфія

Нарадзіўся ў горадзе Мінску ў сям’і беларускіх татараў. Бацька будучага мастака займаўся земляробствам, маці вяла хатнюю гаспадарку. У 1913 годзе паступіў у рамеснае вучылішча па слясарнай спецыяльнасці, але ў сувязі з Першай сусветнай вайной і эвакуацыяй вучылішча ў 1914 годзе навучанне скончылася. У 1916 годзе ўладкаваўся ў Чыгуначную друкарню вучнем–наборшчыкам, дзе працаваў да 1918 года.

Маляваннем і жывапісам пачаў займацца самастойна, у вольны ад працы час. Яго работы ўпершыню з’явіліся ў 1921 годзе на I мастацкай выставе ў Мінску. Пасля гэтага быў накіраваны на вучобу ў Вышэйшыя мастацка–тэхнічныя майстэрні (ВХУТЕМАС) ў Маскву. З-за адсутнасці сярэдняй адукацыі Гембіцкага прынялі толькі на рабфак. У 1923 годзе праз цяжкае матэрыяльнае становішча ён быў вымушаны прыпыніць вучобу і вярнуцца ў Мінск да бацькоў. Пазней вучыўся на графічным факультэце Маскоўскага дзяржаўнага акадэмічнага мастацкага інстытута (1931—1938) у Уладзіміра Фаворскага і Андрэя Ганчарова. Дыпломная работа ў тэхніцы дрэварыту — ілюстрацыі да аповесці Я. Коласа «Дрыгва» (1938), чатыры аркушы з яе купленыя Маскоўскім музеем выяўленчых мастацтваў. У пачатку 1930-х арыштоўваўся НКУС, але быў выпушчаны. Сталую творчую працу пачаў у канцы 1930-х, працаваў у станковай графіцы ў тэхніках дрэварыту і каляровай лінагравюры. Сярод іншых тагачасных беларускіх графікаў вылучаўся цікаўнасцю да стварэння шматфігурных кампазіцый.

З 1940 года быў членам Беларускага саюза мастакоў.

Пахаваны на мінскіх Чыжоўскіх могілках.

Літаратура

• Календарыюм // «Czasopis», № 10/2005.
• Беларускі саюз мастакоў, 1938—1998: энцыкл. давед. — Мн., 1998.