Ірына Міхайлаўна Дароніна

Ірына Міхайлаўна Дароніна
Дата нараджэння	31 студзеня 1919(1919-01-31) (105 гадоў)
Месца нараджэння	Масква, Маскоўская губерня, РСФСР
Адукацыя	Маскоўская дзяржаўная акадэмія харэаграфіі[d] (1937)
Прафесія	балерына
Тэатр	Беларускі дзяржаўны Вялікі тэатр оперы і балета Moiseyev Ballet[d]

Ірына Міхайлаўна Дароніна (31 студзеня 1919, Масква) — беларуская артыстка балета.

Біяграфія

У 1937 годзе скончыла Маскоўскае харэаграфічнае вучылішча.

У 1937—1938 і 1939—1962 (з перапынкам) салістка Дзяржаўнага тэатра оперы і балета Беларусі.

У 1938—1939 працавала ў Дзяржаўным ансамблі танца СССР пад кіраўніцтвам І. Майсеева.

Творчасць

Характарная танцоўшчыца, вылучалася сцэнічным тэмпераментам, акцёрскім дараваннем, мімічнай выразнасцю. Найбольш цікавымі і своеасаблівымі ў яе выкананні былі гратэскавыя партыі і народныя танцы.

У нацыянальным рэпертуары першая ўвасобіла вобразы Хмары («Князь-возера» В. Залатарова) і пані Ядвігі («Падстаўная нявеста» Г. Вагнера).

Сярод іншых партый: фея Карабос («Спячая прыгажуня» П. Чайкоўскага), Марцаліна («Марная засцярога» П. Л. Гертэля), Гудула («Эсмеральда» Ц. Пуні), Другая жонка («Бахчысарайскі фантан» Б. Асаф’ева), Бармалеіха, Варвара («Доктар Айбаліт» І. Марозава); танцы — венгерскі, іспанскі, мазурка («Лебядзінае возера»), усходні («Шчаўкунок» П. Чайкоўскага), цыганскі («Дон Кіхот» Л. Мінкуса); характарныя танцы ў операх «Іван Сусанін» М. Глінкі, «Князь Ігар» А. Барадзіна, «Кармэн» Ж. Бізэ, «Аіда» Дж. Вердзі і інш.

Літаратура

• Ірына Міхайлаўна Дароніна // Тэатральная Беларусь: энцыклапедыя : у 2 т. / рэдкал.: Г. П. Пашкоў [і інш.]. — Мн.: Беларуская Энцыклапедыя, 2002. — Т. 1. — 565 с. — 4 000 экз. — ISBN 985-11-0255-5.