Уладзімір Ільіч Вітко

Уладзі́мір Ільіч Вітко́ (нарадзіўся 10 мая 1933 у г.п. Грэск Мінскае вобласці) — беларускі мастак.

Біяграфія

У 1960 годзе скончыў Мінскае мастацкае вучылішча, праз год пераехаў у Віцебск, дзе працаваў мастаком спачатку на фабрыцы «КІМ», затым на шаўковым камбінаце, а ў 1968 годзе перайшоў у Віцебскія мастацка-вытворчыя майстэрні. З'яўляецца пастаянным удзельнікам абласных, рэспубліканскіх і міжнародных выставак з 1963 года. Творы У. Вітко захоўваюцца ў музеях Беларусі, Польшчы, у дырэкцыі выставак Мастацкага Фонда Беларусі, а таксама ў прыватных калекцыях ў Беларусі, Расіі, Польшчы, Германіі, Італіі.

Творчасць

Для творчасці мастака характэрна жанравая разнастайнасць. Аўтар пейзажаў, выкананых пераважна ў тэхніцы алейнага жывапісу - «Стары Віцебск» (1988), «Мой дом» (1987), адлюстраванне жыцця прыроды - «Квітнеюць лугі» (1984), «Беларускі пейзаж» (1978), нацюрмортаў - «Кветкі» (1988), партрэтаў - «Партрэт маці» (1978), займаецца сюжэтна-тэматычнай кампазіцыяй - «Спартыўны дзень» (1979). Для жывапіснай манеры мастака характэрнымі з'яўляюцца арыгінальнасць і смеласць каларыту, імкненне да абагульнення форм, дэкаратыўнай гучнасці, альбо, наадварот, наўмыснай прыглушанасці колеру.