Антоній Люстыг

Антоній Люстыг
Antoni Lustyg (Lustig)
Род дзейнасці	багаслоў, манах, педагог
Дата нараджэння	7 верасня 1752
Месца нараджэння	Прусія
Дата смерці	5 чэрвеня 1815
Месца смерці	Полацк
Грамадзянства	Рэч Паспалітая
Веравызнанне	Каталіцкая Царква
Месца працы	Полацкі езуіцкі калегіум Віцебскі езуіцкі калегіум Аршанскі езуіцкі калегіум Магілёўскі езуіцкі калегіум Полацкая езуіцкая акадэмія

Антоній Люстыг (7 верасня 1752, Прусія – 5 чэрвеня 1815, Полацк) –каталіцкі духоўны дзеяч і педагог, уплывовы дзеяч Ордэна езуітаў.

Уступіў у Таварыства Ісуса ў 1768 годзе ў Ломжы, а духоўны сан атрымаў у 1776 годзе ў Полацку, дзе ў 1780-1786 гадах выкладаў у езуіцкім калегіуме нямецкую мову. Выконваў функцыі прэфекта школы і прафесара нямецкай мовы ў езуіцкіх калегіумах Віцебска (1787-1789), Оршы (1789-1791) і Магілева (1791-1792), прычым у апошнім з 1793 па 1802 гады займаў пасаду рэктара. Апрача педагагічнай дзейнасці Люстыг паспяхова працаваў у Таварыстве Ісуса: быў асістэнтам Генеральнага вікарыя ордэна (1799-1815) і правінцыялам (1802-1805), арганізаваў езуіцкую місію ў наваколлі Саратава, а таксама займаў пасаду рэктара Полацкай езуіцкай акадэміі (1805-1812). Антоній Люстыг браў актыўны ўдзел у падрыхтоўцы адкрыцця Полацкай езуіцкай акадэміі і з’яўляўся яе першым рэктарам (да 1 жніўня 1814 года).

Літаратура

• Encyklopedia wiedzy o jezuitach na ziemiach Polski i Litwy 1564-1995 / oprac. Ludwik Grzebień ; [aut. i red. działów Andrzej Paweł Bieś et al. ; współpr. nauk. i red. Roman Darowski]. – Kraków : Wydział Filozoficzny Towarzystwa Jezusowego. Instytut Kultury Religijnej : Wydawnictwo WAM – Księża Jezuici, 1996. – XVI, 882, [5] s. : il.