Аксана Іванаўна Манкевіч
| Аксана Іванаўна Манкевіч | |
|---|---|
| Род дзейнасці | экскурсавод, палітычны вязень |
| Дата нараджэння | 20 мая 1998 (25 гадоў) |
| Месца нараджэння | |
| Грамадзянства | |
| Альма-матар | |
Аксана Іванаўна Манкевіч (нар. 10 мая 1998) — экскурсаводка, палітычная зняволеная, абвінавачаная падчас пратэстаў у Беларусі ў 2020 годзе[1].
Біяграфія[правіць | правіць зыходнік]
Нарадзілася ў Любчы. Пасля школы скончыла педагагічны каледж у Нясвіжы, пасля завочна атрымала вышэйшую адукацыю ў БДЭУ. Працавала па спецыяльнасці экскурсаводам, стварыла і праводзіла шэраг экскурсій па Мінску[2] і іншым месцам Беларусі.
Палітычны пераслед[правіць | правіць зыходнік]
Аксану Манкевіч затрымалі 31 студзеня 2021 года, калі яна праводзіла сваю экскурсію па цэнтры Мінска, таксама былі затрыманы іншыя прысутныя на экскурсіі, а таксама выпадковыя мінакі. Некалькі чалавек пазней атрымалі штрафы, яшчэ некалькім удзельнікам экскурсіі, у тым ліку Манкевіч, суд прызначыў суткі адміністрацыйнага арышту (Манкевіч атрымала 15 сутак)[3].
Наступны раз Манкевіч была затрымана 2 лістапада 2021 года. Яе экскурсію замовіў, як пасля высветлілася, супрацоўнік міліцыі, які на прызначаным месцы пачатку экскурсіі затрымаў Манкевіч. Яе дапыталі ў памяшканні ГУБАЗіКа, пасля правялі вобшук дома, пасля чаго ў РАУСе быў зроблены пратакол пра «непадпарадкаванне супрацоўніку міліцыі». На судзе супрацоўнік міліцыі засведчыў, што ён затрымліваў Манкевіч, але памылкова назваў абставіны затрымання, а сама Манкевіч сцвярджала, што яе затрымліваў іншы супрацоўнік. У выніку, суддзя Шабуня прысудзіла Манкевіч 15 сутак арышту[4].
У межах ужо крымінальнай справы Аксана Манкевіч была затрымана 14 верасня 2022 года[5], з яе ўдзелам з’явілася відэа на адным з праўладных тэлеграм-каналаў, дзе сцвярджалася, што «Манкевіч падчас сваіх экскурсій апавядала выключна сваю версію гістарычных падзей». Пазней ёй было выстаўлена абвінавачванне па арт. 342 Крымінальнага кодэксу (Арганізацыя і падрыхтоўка дзеянняў, што груба парушаюць грамадскі парадак), яна была змешчана ў СІЗА на Валадарскага.
5 кастрычніка 2022 года пяццю беларускімі праваабарончымі арганізацыямі, сярод якіх Праваабарончы цэнтр «Вясна» і Беларускі Хельсінкскі камітэт, Манкевіч была прызнана палітычнай зняволенай[6].
У снежні 2022 года Аксану Манкевіч асудзілі да трох гадоў хатняй хіміі[7].
Зноскі
- ↑ АКСАНА МАНКЕВІЧ (бел.)
- ↑ Экскурсія па вуліцы Кастрычніцкай у Менску з’явілася ў межах фестывалю «Vulica Brazil» (бел.)
- ↑ В Минске дали 15 суток экскурсоводу, ее задержали вместе с группой. Вот что говорят очевидцы (руск.)
- ↑ В Минске гида арестовали на 15 суток за «неподчинение милиционеру». Он заказал экскурсию, но на месте встречи ее задержал (руск.)
- ↑ В Минске задержали экскурсоводку Оксану Манкевич (руск.)
- ↑ Заява праваабарончых арганізацый Беларусі аб прызнанні 15 палітычных зняволеных (бел.)
- ↑ Прысуд журналісту Дзянісу Івашыну пакінулі без зменаў, асудзілі экскурсаводку Аксану Манкевіч. Новы Час (20 снежня 2022).
Спасылкі[правіць | правіць зыходнік]