А сэка

Фрэска Святая Ганна (VIII–IX стст.), выкананая ў тэхницы al secco

А сэ́ка (італ.: a secco — літаральна «па сухім») — разнавіднасць тэхнікі насценнай размалёўкі (жывапісу), выкананай, у адрозненне ад фрэскі, па цвёрдай, высахлай тынкоўцы, якая перад працай увільгатняецца. Для працы выкарыстоўваюцца фарбы, расцёртыя на раслінным клеі, яйках або змешаныя з вапнай.

Асаблівасці тэхнікі

Тэхніка а-сэка дазваляе распісваць за працоўны дзень значна большую плошчу паверхні, чым пры працы ў тэхніцы фрэскі. Аднак такія размалёўкі менш даўгавечныя. Тэхнікай а-сэка таксама называюць казеінавы і сілікатны (мінеральны) жывапіс па прасохлай тынкоўцы. Яна можа выкарыстоўвацца як на ўнутраных, так і на знешніх паверхнях будынкаў. Тэхніка дазваляе рабіць выпраўленні тэмперай і прамываць паверхню чыстай вадой.

Гісторыя

Тэхніка а-сэка была распрацавана ў сярэднявечным жывапісе адначасова з фрэскай. Асаблівае распаўсюджанне ў Еўропе яна атрымала ў XVII—XVIII стагоддзях.

Літаратура

• А сэка // Беларуская энцыклапедыя: У 18 т. Т. 2: Аршыца — Беларусцы / Рэдкал.: Г. П. Пашкоў і інш. — Мн. : БелЭн, 1996. — Т. 2. — С. 64. — 480 с. — 10 000 экз. — ISBN 985-11-0035-8. — ISBN 985-11-0061-7 (т. 2).
• Энциклопедический словарь юного художника (руск.) / склад. Н. И. Платонова, В. Д. Синюков. — М.: Педагогика, 1983. — С. 386. — 416 с.

Спасылкі

• На Вікісховішчы ёсць медыяфайлы па тэме А сэка