Аршанскі дзяржаўны аграрны каледж
| Аршанскі дзяржаўны аграрны каледж | |
|---|---|
| Дата заснавання | 1900 |
| Тып | каледж |
| Размяшчэнне | |
| Адрас | Віцебская вобласць, Аршанскі раён, аг. Смальяны |
| ogak.by | |
Установа адукацыі «Аршанскі дзяржаўны аграрны каледж» — дзяржаўная сярэдняя спецыяльная навучальная ўстанова ў аграгарадку Смальяны Аршанскага раёна Віцебскай вобласці.
Гісторыя[правіць | правіць зыходнік]
Гістарычны пачатак адукацыі каледжа быў пакладзены ў студзені 1900 года па ініцыятыве і на сродкі мясцовага памешчыка Валяр’яна Аляксандравіча Цітова, які ўтварыў найнізкую сельскагаспадарчую школу першага разраду. Школа рыхтавала спецыялістаў сельскагаспадарчай вытворчасці для памешчыцкіх гаспадарак. Смальянская сельскагаспадарчая школа праіснавала да верасня 1917 года.
У снежні 1918 года на базе сельскагаспадарчай школы быў утвораны і пачаў працаваць сельскагаспадарчы тэхнікум, які ў 1922 годзе быў ператвораны ў прафшколу.
У 1930 годзе з Касцюковічаў у Смальяны пераведзены сельскагаспадарчы тэхнікум. У часы вайны ў навучальным корпусе была ўладкавана казарма для салдат, у падвальным памяшканні — турма. Пасля вайны праца ў тэхнікуме аднавілася.
Навучальныя заняткі праводзіліся ў прыстасаваных памяшканнях, але ўжо ў 1945 годзе быў зроблены першы пасляваенны выпуск у колькасці 26 чалавек. Пабудаваліся і ўступілі ў строй навучальныя карпусы, вучэбна-вытворчыя аб’екты. У 1973 годзе Смальянскі сельскагаспадарчы тэхнікум быў ператвораны ў саўгас-тэхнікум. З 1998 года саўгас-тэхнікум рэфармаваны ў сельскагаспадарчы тэхнікум. У 2001 годзе тэхнікуму прысвоены статус каледжа.
У 2019 годзе быў перайменаваны ў Аршанскі дзяржаўны аграрны каледж[1].
Характарыстыка[правіць | правіць зыходнік]
Каледж мае два навучальныя корпусы, дом культуры, сталовую, тры інтэрнаты, вучэбна-вытворчыя майстэрні. Корпусы месцяць 40 спецыялізаваных кабінетаў і лабараторый, два камп’ютарныя класы, лабараторыю тэхнічных сродкаў навучання. Працуе бібліятэка, кніжны фонд налічвае каля 49 тысяч асобнікаў, маецца чытальная зала. На тэрыторыі каледжа створана шмат спартыўных збудаванняў.
Каледж мае вучэбна-вытворчую гаспадарку, вучэбна-вытворчы севазварот, вучэбны палігон, вучэбна-вытворчыя майстэрні, калекцыйна-доследнае поле, сад, цяпліцу, вучэбна-геадэзійны палігон[2].
Зноскі
- ↑ Цяпер гэта аршанскі коледж. — Аршанскі рэгіянальны партал, 7 сакавіка 2019. (бел.)
- ↑ Смальянскі аграрны дзяржаўны каледж. — Прыдзвінскі край: гісторыя і сучаснасць, 18 красавіка 2017. (бел.)
Літаратура[правіць | правіць зыходнік]
- Бондарава, Т. Быць гаспадаром на сваёй зямлі / Т. Бондарава // Настаўніцкая газета. — 2017. — 8 ліп. — С. 13.
- Бондарава, Т. Справа гонару / Т. Бондарава // Настаўніцкая газета. — 2017. — 1 крас. — С. 5.
- Гатоўская, Л. Сельская інтэлігентка з кандыдацкай ступенню / Л. Гатоўская // Аршанская газета. — 2016. — 4 лістап. — С. 1.
- Кавалёва, А. І акадэмік, і трактарыст вучыліся ў Смальянах / А. Кавалёва // Аршанская газета. — 2000. — 23 лістап. — С. 1, 3.
- Ціханава, В. Весткі са Смалянскага аграрнага каледжа / В. Ціханава // Аршанская газета. — 2002. — 16 лістап. — С. 3.
- Смальянскі аграрны каледж // Беларуская энцыклапедыя: У 18 т. Т. 15: Следавікі — Трыо / Рэдкал.: Г. П. Пашкоў і інш. — Мн. : БелЭн, 2002. — Т. 15. — С. 46. — 10 000 экз. — ISBN 985-11-0035-8. — ISBN 985-11-0251-2 (т. 15).