Баляслаў Часлававіч Свентаржэцкі

З пляцоўкі Вікіпедыя
Jump to navigation Jump to search
Баляслаў Часлававіч Свентаржэцкі
Болеслав Чеславович Свенторжецкий.jpg
 
Нараджэнне 1831
Смерць 1888
 
Ваенная служба
Бітвы

Баляслаў Часлававіч Свентаржэцкі (1831, маёнтак Багушэвічы, Ігуменскі павет, Мінская губерня, Расійская Імперыя — 1888) — кіраўнік Судзеньскага паўстання (1863—1864) у Ігуменскім павеце Мінскай губерні.

Паходжанне і сям'я[правіць | правіць зыходнік]

Належаў да старажытнага каталіцкага шляхецкага роду Свентаржэцкіх гербу «Трубы».

Баляслаў Часлававіч Свентаржэцкі нарадзіўся ў 1831 г. у маёнтку Багушэвічы Ігуменскага павета Мінскай губерні Расійскай Імперыі (цяпер Бярэзінскі раён Мінскай вобласці Рэспублікі Беларусь) — у сям'і Чэслава Тадэушавіча Свентаржэцкага (нар. у 1802 г.) і Ганны Аляксееўны Свентаржэцкай.

Бацька (Чэслаў Свентаржэцкі) валодаў маёнткам Франскоўшчызна (Франскоўшчына) у Мінскім павеце Мінскай губерні і выбіраўся дваранамі на пасаду дэпутата ад Мінскага павета ў Мінскі дваранскі дэпутацкі сход. Дзед — Тадэвуш Антоніевіч Свентаржэцкі — выбіраўся на пасаду мінскага павятовага маршалка.

Хросным бацькам Баляслава Свентаржэцкага быў мінскі губернскі маршалак (1823—1847) Леў Францавіч Оштарп (1785—1851), а жонкай стала Лаура Казіміраўна Завадская, пляменніца Льва Оштарпа.

Адукацыя[правіць | правіць зыходнік]

Вучыўся ў Віленскім дваранскім інстытуце (скончыў у 1853 г.), Санкт-Пецярбургскім універсітэце; у час эміграцыі — у ваеннай школе ў Францыі.

Маёнтак[правіць | правіць зыходнік]

Валодаў спадчынным маёнткам Багушэвічы ў Ігуменскім павеце Мінскай губерні (Расійская Імперыя).

Служба[правіць | правіць зыходнік]

Служыў пісарам у Мінскім Дваранскім дэпутацкім сходзе. З 1860 г. знаходзіўся пад сакрэтным наглядам паліцыі. Як член Мінскага губернскага камітэта ўдзельнічаў у распрацоўцы ўмоў сялянскай рэформы (1861) у Расійскай Імперыі.

Удзел у Студзеньскім паўстанні (1863—1864)[правіць | правіць зыходнік]

Падчас паўстання 1863—1864 гадоў з'яўляўся паўстанцкім начальнікам Ігуменскага павета — камісарам аб'яднаных паўстанцкіх атрадаў у Ігуменскім павеце Мінскай губерні. Знаходзіўся пры атрадзе С.Ляскоўскага.

Сядзіба Свентаржэцкіх у вёсцы Багушэвічы (Ігуменскі павет, Мінская губерня) была знішчана паводле загаду віленскага генерал-губернатара Міхаіла Мікалаевіча Мураўёва.

Эміграцыя ў Францыю[правіць | правіць зыходнік]

Увосень 1863 г. эмігрыраваў на пастаяннае месца жыхарства ў Францыю, за якую ваяваў падчас франка-прускай вайны (1870—1871).

Памёр у 1888 г.

Зноскі

Літаратура[правіць | правіць зыходнік]

  • Кісялёў, Г. В. На пераломе дзвюх эпох: Паўстанне 1863 г. на Міншчыне / Г. В. Кісялёў. — Мн., 1990.