Браслаўская града

З пляцоўкі Вікіпедыя
Jump to navigation Jump to search
Браслаўская града
BraslavRaion1.JPG

Брасла́ўская града́ — узвышша, якое знаходзіцца на крайнім паўночным захадзе Беларусі, займае большую частку Браслаўскага і частку Мёрскага раёнаў Віцебскай вобласці.

На поўначы града абмежавана далінай Заходняй Дзвіны, на ўсходзе і поўдні — Полацкай нізінай. Працягнулася з захаду на ўсход на 66 км, з поўначы на поўдзень — амаль на 60 км, плошча 1,9 тыс. км². Найбольшая вышыня — Воўчая гара — 210 м над узроўнем мора з'яўляецца найвышэйшай кропкай Мёрскага раёна. Знаходзіцца прыкладна ў 10 км на ўсход ад вёскі Слабодка Браслаўскага раёна.

Града канчаткова аформілася ў час браслаўскага прыпынку (стадыялу) паазерскага ледавіка. У рэльефе вылучаюцца дугападобныя грады, паміж якімі паніжэнні і невялікія азёры. Трапляюцца шматлікія озавыя і камавыя ўзгоркі. Карысныя выкапні: керамічная сыравіна, пясчана-жвіровы матэрыял, торф.

Рэкі належаць да басейна Заходняй Дзвіны, найбольшая — Друйка, якая працякае праз некалькі азёр. Пад азёрамі каля 10 % тэрыторыі, большасць з іх належыць да Браслаўскай групы азёр. Разарана каля 60 % тэрыторыі, пад лесам і хмызняком — каля 20 %.

Браслаўская града вызначаецца маляўнічасцю краявідаў, асабліва там, дзе аблесеныя ўзгоркі спалучаюцца з азёрнымі плёсамі. Тут размешчаны Нацыянальны парк Браслаўскія азёры, зоны адпачынку, санаторыі, дамы адпачынку, турбаза.

Зноскі

Геаграфія Беларусі: Энцыкл. даведнік. — Мн.: БелЭн, 1992. — С. 51-52.