Барыс Сямёнавіч Акрэсцін

Барыс Сямёнавіч Акрэсцін
руск.: Борис Семёнович Окрестин
Дата нараджэння	18 лютага 1923(1923-02-18)
Месца нараджэння	Масква, Маскоўская губерня, РСФСР, СССР
Дата смерці	6 ліпеня 1944(1944-07-06) (21 год)
Месца смерці	Мінскі раён, Мінская вобласць, Беларуская ССР, СССР
Месца пахавання	Вайсковыя могілкі
Грамадзянства	СССР
Прыналежнасць	СССР
Род войскаў	ваенна-паветраныя сілы
Гады службы	1942—1944
Званне	Старшы лейтэнант ВПС СССР
Бітвы/войны	Вялікая Айчынная вайна
Узнагароды і званні	Медаль «За абарону Сталінграда»

Бары́с Сямё́навіч Акрэ́сцін (руск.: Борис Семёнович Окрестин; 18 лютага 1923, Масква — 6 ліпеня 1944, Мінскі раён) — ваенны лётчык, гвардыі старшы лейтэнант, удзельнік Вялікай Айчыннай вайны. Герой Савецкага Саюза (1944).

Біяграфія

Нарадзіўся 18 лютага 1923 года ў Маскве.

Скончыў 7 класаў школы. Вучыўся ў аэраклубе «Метрабуда», працаваў у ім авіятэхнікам і лётчыкам-інструктарам. У 1942 годзе прызваны на службу ў РСЧА. У дзейнай арміі з верасня 1942 года на Сталінградскім, Паўднёвым, 4-м Украінскім, 3-м Беларускім франтах. Удзельнік Сталінградскай бітвы, вызвалення Украіны і Беларусі. У 1943 годзе ўступіў у ВКП(б).

Намеснік камандзіра эскадрыллі 74-га гвардзейскага штурмавога авіяпалка 1-й гвардзейскай авіядывізіі гвардыі старшы лейтэнант Акрэсцін да канца снежня 1943 года здзейсніў 381 баявы вылет, знішчыў больш за 40 танкаў, два бронеаўтамабілі, два самалёты і вялікую колькасць іншай баявой тэхнікі і жывой сілы праціўніка. Лятаў на самалётах По-2 і Іл-2. У баі над горадам Нікапалем (Днепрапятроўская вобласць) цяжка паранены. Удзельнічаў у вызваленні Талачына (Віцебская вобласць), штурмаваў эшалоны праціўніка на ўчастку чыгункі Орша—Талачын.

6 ліпеня 1944 года за 20 км на паўднёвы ўсход ад Мінска (у раёне вышыні 247 за 3 км на паўночны захад ад Абчака) у час баёў па ліквідацыі варожай групоўкі, якая прарывалася з мінскага катла, самалёт Барыса Акрэсціна падбіты. Лётчык накіраваў ахопленую агнём машыну на калону праціўніка.

Магіла Барыса Акрэсціна на Вайсковых могілках у Мінску

Пахаваны ў Мінску на Вайсковых могілках.

Узнагароды

• Медаль «Залатая Зорка»
• Ордэн Леніна
• Два ордэны Чырвонага Сцяга
• Ордэн Аляксандра Неўскага
• Ордэны Айчыннай вайны I і II ступені
• Ордэн Чырвонай Зоркі
• Медаль «За абарону Сталінграда»

Памяць

• Імя Барыса Акрэсціна ў 1966 годзе нададзена сярэдняй школе № 65 (сучасная гімназія № 30) у Мінску, на тэрыторыі школы помнік Акрэсціну і яшчэ 9 лётчыкам.
• Імем Барыса Акрэсціна названы вуліца Акрэсціна і завулак Акрэсціна ў Мінску, вуліца Акрэсціна ў Лідзе (Гродзенская вобласць) і вуліца Акрэсціна ў Саранцы (Пільнінскі раён, Ніжагародская вобласць Расіі).
• Імя Барыса Акрэсціна нададзена скверу ў Мінску ў межах вуліц Акрэсціна — Грушаўская — Дубравінская — Абухоўская — Пермская (бел.: «сквер Бары́са Акрэ́сціна», руск.: «сквер Бори́са Окре́стина»).
• Помнік на магіле на Вайсковых могілках у Мінску.

Літаратура

• Памяць: Гісторыка-дакументальная хроніка Талачынскага раёна / Рэдкал.: І. П. Шамякін (гал. рэд.) і інш.. — Мн.: БелСЭ, 1988. — С. 278. — 654 с. — 20 000 экз. — ISBN 5-85700-007-6.

Спасылкі

• Барыс Сямёнавіч Акрэсцін на сайце «Героі краіны»
• Качук Н. Хроника пикирующего истребителя // Газета «Советская Белоруссия» (руск.)
• Качук Н. Возвращение из неизвестности // Газета «Советская Белоруссия» (руск.)
• Ручанов С. День рождения Героя Архівавана 27 лютага 2016. // Газета Мінісэрства абароны Рэспублікі Беларусь "Белорусская военная газета. «Во славу Родины» (руск.)