Ваенная служба

     Няма ўзброеных сіл      Няма прымусовай вайсковай павіннасці      Актыўная сістэма прызыву, але прызываюцца менш за 20 % усёй узроставай групы      Плануецца адмяніць прызыў у найбліжэйшай будучыні      Агульная вайсковая павіннасць      Няма інфармацыі

Вае́нная слу́жба, або вайско́вая слу́жба — від службы, які заключаецца ў выкананні грамадзянамі вызначанага законам дзяржавы воінскага абавязку (воінскай павіннасці) ва узброеных сілах на працягу пэўнага тэрміну.

Агульная характарыстыка

Ваеннаслужачыя УС ЗША

Ваенная служба ў розных формах ажыццяўляецца ў большасці дзяржаў. Яна выконваецца грамадзянамі ў абавязковым парадку, добраахвотна або па найме. Гэты від дзейнасці ўключае абавязковую службу ў мірны час і непасрэдны ўдзел у ваенных дзеяннях у час вайны.

У Беларусі

У Беларусі ваенная служба лічыцца асобым відам дзяржаўнай службы, якая заключаецца ў выкананні яе грамадзянамі канстытуцыйнага абавязку ў складзе Узброеных Сіл і іншых вайсковых фарміраванняў. Паводле закону «Аб усеагульным воінскім абавязку і ваеннай службе» (1992) устаноўлены наступныя віды ваеннай службы: тэрміновая служба салдат, матросаў, сяржантаў і старшын; служба курсантаў ваенна-навучальных устаноў (сярэднія і вышэйшыя ваенныя вучылішчы, ваенныя інстытуты, ваенныя факультэты пры цывільных ВНУ, ваенныя акадэміі); служба паводле кантракту прапаршчыкаў і мічманаў; а таксама служба афіцэраў паводле прызыву і кантракту.

Навучэнцы Мінскага сувораўскага ваеннага вучылішча

Зыходзячы з важнасці ваеннай службы, устанаўліваецца яе прыярытэт перад іншымі відамі дзяржаўнай службы і працоўнай дзейнасці. Пры прызыве або добраахвотным паступленні на ваенную службу работа, вучоба і іншая дзейнасць грамадзян на прадпрыемствах, у арганізацыях і ўстановах (незалежна ад формаў уласнасці і ўмоў гаспадарання) спыняецца. Парадак праходжання ваеннай службы для кожнай катэгорыі ваеннаслужачых рэгламентуецца законамі, воінскімі статутамі, палажэннем аб праходжанні ваеннай службы і іншымі нарматыўна-прававымі актамі.

Літаратура

• Ваенная служба // Беларуская энцыклапедыя: У 18 т. Т. 3: Беларусы — Варанец / Рэдкал.: Г. П. Пашкоў і інш. — Мн. : БелЭн, 1996. — Т. 3. — С. 444. — 511 с. — 10 000 экз. — ISBN 985-11-0035-8. — ISBN 985-11-0068-4 (т. 3).