Асарэвічы

Вёска Асарэвічы Краіна Беларусь Вобласць Гомельская Раён Брагінскі Сельсавет Новаялчанскі Каардынаты 51°36′33″ пн. ш. 30°29′36″ у. д. Першая згадка XVIII стагоддзе Насельніцтва 394 чалавекі (2004) Часавы пояс UTC+3 Тэлефонны код +375 2344 Паштовыя індэксы 247662 Аўтамабільны код 3 СААТА 3203843002 Асарэвічы Асарэвічы

Асарэ́вічы (трансліт.: Asarevičy, руск.: Асаревичи) — вёска ў Брагінскім раёне Гомельскай вобласці. Уваходзіць у склад Новаялчанскага сельсавета.

Назва

Па адной з версій, назва можа паходзіць ад старажытнабалцкага двухасноўнага імені тыпу A-saras. Ёсць латышскія прозвішчы Asars, Asaris.

Геаграфія

Размяшчэнне

У 38 км на паўднёвы ўсход ад Брагіна, 14 км ад чыгуначнай станцыі Ёлча (на лініі Оўруч — Палтава), 168 км ад Гомеля, 1,5 км ад дзяржаўнай мяжы з Украінай.

Забудова драўлянымі хатамі сядзібнага тыпу. Захаваўся стары парк.

Водная сістэма

На паўночным усходзе возера Асарэвіцкае, на ўсходзе пойма ракі Дняпро.

Транспартная сістэма

Транспартныя сувязі па прасёлкавай, потым аўтадарозе Камарын — Брагін.

Планіроўка складаецца з трох амаль просталінейных, паралельных паміж сабой вуліц мерыдыянальнай арыентацыі, злучаных завулкамі, да якіх на поўначы далучаюцца 2 выгнутыя, паралельныя паміж сабой і злучаныя двума завулкамі вуліцы, арыентаваныя з паўднёвага захаду на паўночны ўсход.

Гісторыя

Выяўленыя археолагамі гарадзішча і бескурганны магільнік VI стагоддзя да н.э. — II стагоддзя н.э. (у 2 км ад вёскі, на правым беразе ракі Лебядзеўка ва ўрочышчы Пад’емец) сведчаць пра засяленне гэтых месцаў са старажытных часоў. Гэта пацвярджаецца знойдзеным скарбам, які складаецца са 119 срэбных манет 1597—1601 гадоў.

Паводле пісьмовых крыніц вядомая з XVIII стагоддзя. У 1811 годзе згадана як вёска ў Рэчыцкім павеце Мінскай губерні. У 1834 годзе конны млын. У 1897 годзе — школа граматы, хлебазапасны магазін, 2 карчмы, 2 крамы. Побач быў аднайменны фальварак.

З 8 снежня 1926 года цэнтр Асарэвіцкага сельсавета Камарынскага, з 25 снежня 1962 года Брагінскага раёнаў Рэчыцкай і з 9 чэрвеня 1927 года Гомельскай (з 26 ліпеня 1930 года) акруг, з 20 лютага 1938 года Палескай, з 8 студзеня 1954 года Гомельскай абласцей. У 1929 годзе дзейнічалі школа, аддзяленне спажывецкай кааперацыі. У 1930 годзе арганізаваны калгас, працавалі паравы млын, вятрак, гамарня.

Падчас Вялікай Айчыннай вайны у верасні-кастрычніку 1943 года ў баях за вызваленне вёскі і суседніх населеных пунктаў загінулі 54 салдаты 9-га гвардзейскага стралковага корпуса і 2 партызаны (пахаваны ў брацкай магіле, у скверы). Сярод захаваных Героі Савецкага Саюза Е. І. Данільянц, А. Г. Даўлетаў, У. М. Кастрыкін, М. М. Уласаў, М. М. Ярэмкін, якія адзначыліся ў баях за вызваленне Брагінскага раёна.

У 1959 годзе цэнтр калгаса імя М. В. Фрунзэ. Размяшчаліся сярэдняя школа, Дом культуры, бібліятэка, фельчарска-акушэрскі пункт, аддзяленне сувязі, крама.

26 верасня 2006 года Асарэвіцкі сельсавет быў скасаваны, і Асарэвічы ўвайшлі ў склад Новаялчанскага сельсавета.

Насельніцтва

Колькасць

• 186 двароў, 394 жыхары.

Дынаміка

• 1834 год — 48 двароў.
• 1897 год — 88 двароў, 608 жыхароў (паводле перапісу).
• 1929 год — 1093 жыхары.
• 1959 год — 886 жыхароў (паводле перапісу).
• 2004 год — 186 двароў, 394 жыхары.

Славутасць

• Бескурганны могільнік перыяду ранняга жалезнага веку (VI—II стагоддзі да н.э.), 2,3 км на поўнач ад вёскі, на правым беразе р. Днепр, на левым беразе р. Лебядзёўка, урочышча Пад’ямец, каля гарадзішча (шыфр 313В000103) —  Гісторыка-культурная каштоўнасць Беларусі, шыфр 313В000104.
• Гарадзішча перыяду ранняга жалезнага веку (VII—IV стагоддзі да н.э.), 2,3 км на поўнач ад вёскі, на правым беразе р. Днепр, на левым беразе р. Лебядзёўка, урочышчы Гарадок, Пад’ямец —  Гісторыка-культурная каштоўнасць Беларусі, шыфр 313В000106.

Літаратура

• Гарады і вёскі Беларусі: Энцыклапедыя. Т. 1, кн. 1. Гомельская вобласць / С. В. Марцэлеў; рэдкал.: Г. П. Пашкоў (дырэктар) і інш. — Мн.: Беларуская Энцыклапедыя імя Петруся Броўкі, 2004. — 632 с.: іл. — 4 000 экз. — ISBN 985-11-0303-9.

Спасылкі

• На Вікісховішчы пакуль няма медыяфайлаў па тэме, але Вы можаце загрузіць іх