Васілевічы (Магілёўскі раён)

Вёска Васілевічы Краіна Беларусь Вобласць Магілёўская Раён Магілёўскі Сельсавет Сухарэўскі Каардынаты 54°01′03″ пн. ш. 30°39′20″ у. д. Насельніцтва 13 чал. (2009) Часавы пояс UTC+3 Тэлефонны код +375 222 Паштовыя індэксы 213117 Аўтамабільны код 6 СААТА 7244856011 Васілевічы на карце Беларусі ±

Васіле́вічы (трансліт.: Vasilievičy, руск.: Василевичи) — вёска ў Магілёўскім раёне Магілёўскай вобласці. Уваходзіць у склад Сухарэўскага сельсавета. Размешчана за 30 км на паўночны ўсход ад Магілёва і чыгуначнай станцыі Лупалава на лініі Магілёў — Крычаў. Рэльеф раўнінны. На поўнач цячэ р. Раста (прыток р. Проня). Транспартныя сувязі па мясцовай дарозе праз вёскі Еганы, Кругі і далей па шашы Санкт-Пецярбург — Адэса.

Гісторыя

Вялікае Княства Літоўскае

Вядома ў Вялікім Княстве Літоўскім з пачатку XVII ст. У 1604 годзе сяло ў Даманаўскім войтаўстве Магілёўскага староства-эканоміі Аршанскага павета Віцебскага ваяводства, дзяржаўная ўласнасць.

Пад уладай Расійскай імперыі

У выніку першага падзелу Рэчы Паспалітай у 1772 годзе апынулася ў складзе Расійскай імперыі. У 1785 годзе ў складзе маёнтка Сухары Чавускага павета, уласнасць памешчыка, які меў тут у 1872 годзе 435 дзесяцін зямлі. Паводле перапісу 1897 года ў Чартоўскай воласці Чавускага павета Магілёўскай губерні.

Найноўшы час

У 1913 годзе адкрыта царкоўна-прыходская школа, якая размяшчалася ў наёмным памяшканні.

25 сакавіка 1918 года згодна з Трэцяй Устаўной граматай вёска абвяшчалася часткай Беларускай Народнай Рэспублікі. 1 студзеня 1919 года згодна з пастановай I з’езда КП(б) Беларусі ўвайшла ў склад Беларускай ССР, аднак 16 студзеня Масква адабрала яе разам з іншымі этнічна беларускімі тэрыторыямі ў склад РСФСР. З 26 красавіка 1919 года ў Гомельскай губерні РСФСР. У сакавіку 1924 года вёску вярнулі БССР.

З 20 жніўня 1924 года ў Зарасцянскім сельсавеце Лупалаўскага раёна Магілёўскай акругі, з 26 ліпеня 1930 года ў Лупалаўскім, з 2 сакавіка 1931 года ў Чавускім, з 12 лютага 1935 года ў Дрыбінскім раёнах, з 20 лютага 1938 года ў Магілёўскай вобласці.

На базе дарэвалюцыйнай створана працоўная школа першай ступені, у якой у 1925 годзе было 56 вучняў. У 1924 годзе адкрыта хата-чытальня. У 1929 годзе арганізаваны калгас «Рассвет».

У Вялікую Айчынную вайну з ліпеня 1941 года да 27 чэрвеня 1944 года акупіравана нямецка-фашысцкімі захопнікамі. З 16 верасня 1959 года ў Сухарэўскім сельсавеце Чавускага, з 22 студзеня 1965 года Магілёўскага раёнаў. У 1990 годзе ў складзе калгаса «Парыжская Камуна» (цэнтр — в. Зарэсце). Размяшчаліся вытворчая брыгада, ферма буйной рагатай жывёлы.

Планіроўка

Планіровачна складаецца з вуліцы ламанага абрысу, арыентаванай з паўднёвага захаду на паўночны ўсход і забудаванай двухбакова, няшчыльна традыцыйнымі драўлянымі дамамі сядзібнага тыпу.

Насельніцтва

• XVII стагоддзе:
  • 1604 — 46 двароў.
• XVIII стагоддзе:
  • 1785 — 32 двары, 237 жыхароў.
• XIX стагоддзе:
  • 1897 — 56 двароў, 420 жыхароў.
• XX стагоддзе:
  • 1909 — 83 двары, 446 жыхароў.
  • 1926 — 125 двароў, 724 жыхары.
  • 1990 — 35 гаспадарак, 51 жыхар.
• XXI стагоддзе:
  • 2007 — 11 гаспадарак, 14 жыхароў.

Літаратура

• Васілевічы // Гарады і вёскі Беларусі: Энцыклапедыя. Т. 6, кн. 2. Магілёўская вобласць / рэдкал.: Т. У. Бялова (дырэктар) і інш. — Мн.: Беларуская Энцыклапедыя імя Петруся Броўкі, 2009. — 592 с.: іл. — 2 000 экз. — ISBN 978-985-11-0440-2.

Спасылкі

• На Вікісховішчы пакуль няма медыяфайлаў па тэме, але Вы можаце загрузіць іх