Гарнітура (тыпаграфіка)

Гарніту́ра шрыфту (ад ням.: Garnitur) — камплект друкарскіх шрыфтоў аднаго рысунка.

Характарыстыкі

У межах адной гарнітуры шрыфты адрозніваюцца паводле:

• Абрысу (прамы, курсіўны і інш.).
• Памеру (кегля). Вылучаюць тэкставыя кеглі (ад 6-га — нанпарэль, да 12-га — цыцэра) і тытульныя (ад 14-га да 48-га).
• Насычанасці (светлы, паўтлусты і інш.).

Класіфікацыя

Паводле прызначэння гарнітуры падзяляюцца на тэкставыя, тытульныя, акцыдэнтныя (дэкаратыўныя) і афішна-плакатныя. Друкарні звычайна маюць некалькі дзясяткаў розных гарнітур.

Выкарыстанне ў Беларусі

У залежнасці ад віду выдання і чытацкай прыналежнасці ў выдавецтвах Беларусі прымяняецца вялікая колькасць гарнітур.

• Для газет: новая газетная, газетная рубленая, брусковая, а таксама літаратурная, звычайная новая.
• Для часопісаў і кніг: часопісная рубленая, новая часопісная, літаратурная, звычайная новая, Баннікаўская, акадэмічная школьная, брусковая, рубленая.
• Для слоўнікаў і энцыклапедый: Кудрашоўская (энцыклапедычная Кудрашоўская слоўнікавая), Бадоні кніжная, звычайная, звычайная новая.
• Для літаратуры для дашкольнага і школьнага ўзросту: букварная, школьная, Елізавецінская, Баннікаўская, літаратурная, акадэмічная, рубленая.
• Для плакатаў, афіш, рэкламы: плакатная, акцыдэнтная, новая, старажытная, рубленая.

У сувязі з шырокім укараненнем камп'ютарнай тэхнікі найбольш распаўсюджанымі сталі гарнітуры Таймс, Хельветыка, Баскервіль. Камп'ютарныя тэхналогіі дазваляюць ствараць шрыфты новых мадыфікацый.

Літаратура

• Гарнітура // Беларуская энцыклапедыя: У 18 т. Т. 5: Гальцы — Дагон / Рэдкал.: Г. П. Пашкоў і інш. — Мн. : БелЭн, 1997. — Т. 5. — С. 67. — 576 с. — 10 000 экз. — ISBN 985-11-0035-8. — ISBN 985-11-0090-0 (т. 5).
• Касько, У. К.  Мастацкае канструяванне кнігі: ад элемента да сістэмы // Журналістыка-2017: стан, праблемы і перспектывы : матэрыялы 19-й Міжнар. навук.-практ. канф., 16–17 ліст. 2017 г. Vol. Выпуск 19.. — Мінск: БДУ, 2017. — С. 48—52.