Гастраскапія

Гастраскапія — метад эндаскапічнага даследавання ўнутранай паверхні страўніка пры дапамозе спецыяльнага прыбора — гастраскопа, гібкай трубкі, унутры якой — аптычная сістэма са шматлікіх кароткафокусных лінзаў і электрычная лямпачка.

Гастраскапію робяць для дыягностыкі хвароб страўніка (пухліны, язвы, гастрыты), кантролю за дынамікай працэсу, дэталёвага вывучэння слізістай абалонкі.

Пры гастраскапіі магчымы дадатковыя маніпуляцыі:

• дыягнастычныя (біяпсія слізістай абалонкі з гісталагічным і гістахімічным даследаваннем, фатаграфаванне ўнутранай павверхні страўніка)
• лекавыя (выцягванне іншародных цел, выдаленне ці дыятэрмакаагуляцыя пухлін, паліпаў, спыненне крывацёку, у т.л. з дапамогай лазера, увядзенне ў страўнік лекавых прэпаратаў і інш.).

Літаратура

• Беларуская энцыклапедыя: У 18 т. Т. 5: Гальцы — Дагон / Рэдкал.: Г. П. Пашкоў і інш. — Мн. : БелЭн, 1997. — Т. 5. — 576 с. — 10 000 экз. — ISBN 985-11-0035-8. — ISBN 985-11-0090-0 (т. 5).