Дакументазнаўства
Дакументазна́ўства — навуковая дысцыпліна, якая вывучае заканамернасці складання дакументаў, распрацоўвае спосабы іх стварэння, прынцыпы арганізацыі дакументаабарачэння і пабудовы сістэм дакументацыі. Вылучылася з архівазнаўства і архіўнай службы. Звязана з крыніцазнаўствам, якое таксама мае аб’ектам даследавання дакумент[1].
Задачы і функцыі
[правіць | правіць зыходнік]Задачы дакументазнаўства ўключаюць павышэнне эфектыўнасці дакументацыйнага забеспячэння аператыўнага кіравання, а таксама барацьбу з ростам выдаткавання паперы і павелічэння плошчаў, занятых пад сховішчы інфармацыі[1].
Дысцыпліна выконвае канкрэтныя патрэбы грамадства ў дакументальнай сферы. Да іх адносяцца паляпшэнне якасці дакумента і прыстасаванне яго да ўмоў машыннай апрацоўкі інфармацыі, стварэнне машыначытальных дакументаў, мініяцюрызацыя носьбітаў і пераход да бездакументных камунікацый. Таксама дакументазнаўства забяспечвае выкарыстанне дакументаў у аўтаматызаваных банках даных, стварэнне інфармацыйна-пошукавай сістэмы (ІПС) па дакументах, што функцыяніруюць у апараце, і яе сумяшчальнасць з ІПС дзяржаўных архіваў. Важнымі накірункамі з’яўляюцца распрацоўка рацыянальнай сістэмы ўліку і захоўвання дакументаў, наданне юрыдычнай сілы інфармацыі, запісанай на машынных носьбітах[1].
Гісторыя
[правіць | правіць зыходнік]З 1966 года даследаваннямі ў галіне дакументазнаўства займаўся Усесаюзны навукова-даследчы інстытут дакументазнаўства і архіўнай справы, дзе ў якасці сураспрацоўшчыкаў тэм выступалі цэнтральныя дзяржаўныя архівы Беларусі[1].
У незалежнай Беларусі пытаннямі дакументазнаўства займаюцца аддзел справаводства і фарміравання Нацыянальнага архіўнага фонду Дзяржаўнага камітэта па архівах і справаводстве Рэспублікі Беларусь і Беларускі навукова-даследчы інстытут дакументазнаўства і архіўнай справы (у 1992—1995 гадах называўся Беларускім навукова-даследчым цэнтрам дакументазнаўства, археаграфіі і архіўнай справы)[1].
Крыніцы
[правіць | правіць зыходнік]Літаратура
[правіць | правіць зыходнік]- Дакументазнаўства // Беларуская энцыклапедыя: У 18 т. Т. 6: Дадаізм — Застава / Рэдкал.: Г. П. Пашкоў і інш. — Мн. : БелЭн, 1998. — Т. 6. — С. 14. — 576 с. — 10 000 экз. — ISBN 985-11-0035-8. — ISBN 985-11-0106-0 (т. 6).
