Дзяржаўны ўніверсітэт інфраструктуры і тэхналогій

Дзяржаўны ўніверсітэт інфраструктуры і тэхналогій (ДУІТ)
Державний університет інфраструктури та технологій
Арыгінальная назва	Державний університет інфраструктури та технологій
Міжнародная назва	State University of Іnfrastructure and Тechnology
Заснаваны	1898
Рэарганізаваны	2016
Тып	профільны ўніверсітэт
Рэктар	Уладзіслаў Вадзімавіч Панін
Краіна	Украіна
Размяшчэнне	Кіеў
Метро	Кантрактовая плошча
Юрыдычны адрас	вул. Кірылаўская 9, 04071 г. Кіеў, Украіна
Сайт	duit.edu.ua

Дзяржаўны ўніверсітэт інфраструктуры і тэхналогій — украінская дзяржаўная вышэйшая навучальная ўстанова транспартнага профілю са статусам універсітэта, якая знаходзіцца ў Кіеве.

Гісторыя

Дзяржаўны універсітэт інфраструктуры і тэхналогій створаны ў лютым 2016 года шляхам зліцця двух вышэйшых навучальных устаноў — Дзяржаўнага эканоміка-тэхналагічнага ўніверсітэта транспарту і Кіеўскай дзяржаўнай акадэміі воднага транспарту імя гетмана Пятра Канашэвіча-Сагайдачнага.

Карані навучальнай установы сягаюць 1898 года, калі была пачата падрыхтоўка інжынераў-чыгуначнікаў у КПІ. Гэта была першая кузня кадраў для чыгуначнага транспарту ў Кіеве на мяжы ХІХ—ХХ ст. Першы выпуск інжынераў-чыгуначнікаў адбыўся ў 1903 годзе. Акрамя таго, у верасні 1909 быў адкрыты Чыгуначны аддзел Кіеўскіх вышэйшых камерцыйных курсаў з тэхнічнымі навукамі і «эканоміяй шляхоў зносін», а з чэрвеня 1912 ён атрымаў статус вышэйшай навучальнай установы і быў перайменаваны ў Кіеўскі камерцыйны універсітэт. З 1922 года ў складзе КПІ існаваў факультэт інжынераў шляхоў зносін, які рыхтаваў спецыялістаў для сухапутнага і воднага транспарту, а ў створаным пазней Інстытуце шляхоў зносін функцыянавалі факультэты па падрыхтоўцы спецыялістаў як для дарог, так і для водных шляхоў.

У 1929 годзе Народны Камісарыят асветы УССР арганізаваў у Кіеве Інстытут інжынераў шляхоў зносін у складзе пяці факультэтаў. Праз год ён быў рэарганізаваны і ў выніку з 1930 года пачалі працаваць 5 асобных вышэйшых навучальных устаноў:

• Кіеўскі чыгуначны інстытут у складзе 2 факультэтаў;
• Кіеўскі інстытут рачнога транспарту ў складзе 3 факультэтаў;
• Адэскі інстытут марскога транспарту ў складзе 2 факультэтаў;
• Днепрапятроўскі чыгуначны інстытут у складзе 3 факультэтаў;
• Харкаўскі дарожны інстытут у складзе 4 факультэтаў.

Кіеўскі інстытут інжынераў транспарту ў 1934 годзе быў аб’яднаны з Харкаўскім інстытутам інжынераў чыгуначнага транспарту. З 1951 года быў створаны вучэбна-кансультацыйны пункт Усесаюзнага завочнага інстытута інжынераў чыгуначнага транспарту. І толькі 14 ліпеня 1966 года быў арганізаваны філіял Харкаўскай дзяржаўнай акадэміі чыгуначнага транспарту ў Кіеве. А ў 1968 годзе ў Кіеўскім філіяле была адноўлена спецыяльнасць «Эканоміка і арганізацыя чыгуначнага транспарту».

Кіеўскі філіял Харкаўскай дзяржаўнай акадэміі чыгуначнага транспарту ў 1995 годзе спачатку стаў Кіеўскім інстытутам чыгуначнага транспарту, а ў 2001 годзе атрымаў статус самастойнага ўніверсітэта. З 2007 па 2016 гады ён называўся Дзяржаўным эканоміка-тэхналагічным універсітэтам транспарту.

ВНУ водна-транспартнага профілю ў Кіеве сваё паходжанне выводзіць з 1912 года — з часу заснавання на сродкі Саюза суднаходства Кіеўскага рачнога вучылішча першага разраду Міністэрства шляхоў зносін Расійскай імперыі. Вучылішча пачалося з невялікай бібліятэкі, макетаў рачных судоў, макета паравой машыны і чатырох дзясяткаў парт. У пасляваенны час у Кіеве адкрыўся факультэт Ленінградскага інстытута воднага транспарту для падрыхтоўкі спецыялістаў-воднікаў вышэйшай кваліфікацыі, які пазней стаў Інстытутам воднага транспарту Адэскай марской акадэміі. Завяршыўся ж працэс фарміравання ВНУ воднага транспарту таксама пасля здабыцця незалежнасці Украіны, калі на базе Кіеўскага рачнога вучылішча, Інстытута воднага транспарту і суднабудаўнічага тэхнікума ў 1998 годзе была арганізавана самастойная вышэйшая навучальная ўстанова — Кіеўская дзяржаўная акадэмія воднага транспарту, якой у 2003 годзе было прысвоена імя выбітнага ўкраінскага гетмана-флатаводца Пятра Канашэвіча-Сагайдачнага.

Структура

Кіеўскі інстытут воднага транспарту імя гетмана Пятра Канашэвіча-Сагайдачнага

• Факультэт суднаваджэння
• Факультэт эксплуатацыі тэхнічных сістэм на водным транспарце

Кіеўскі інстытут чыгуначнага транспарту

• Факультэт упраўлення чыгуначным транспартам
• Факультэт інфраструктуры і рухомага складу чыгункі

Інстытут упраўлення, тэхналогій і права

• Факультэт упраўлення і тэхналогій
• Юрыдычны факультэт

Адасобленыя структурныя падраздзяленні

• Дунайскі факультэт марскога і рачнога транспарту ў г. Ізмаіл
• Каледж марскога і рачнога флоту ў г. Кіеве
• Кілійскі транспартны каледж

Вучэбна-навуковыя цэнтры

• Кіеўскі трэнажорны цэнтр падрыхтоўкі, перападрыхтоўкі і павышэння кваліфікацыі спецыялістаў воднага транспарту
• Цэнтр паслядыпломнай адукацыі
• Цэнтр давузаўскай падрыхтоўкі

Спасылкі

• Афіцыйная старонка ўніверсітэта Архівавана 12 снежня 2020.