Канстанцін Канстанцінавіч Шараў

Канстанцін Канстанцінавіч Шараў
Канстанцін Канстанцінавіч Шараў
Дата нараджэння	18 студзеня 1954
Месца нараджэння	Мінск, БССР, СССР;
Дата смерці	8 кастрычніка 2017 (63 гады)
Альма-матар	Сярэдняя спецыяльная музычная школа пры Беларускай дзяржаўнай кансерваторыі імя А. В. Луначарскага (1972); Беларуская дзяржаўная кансерваторыя імя А. В. Луначарскага (1977); Латвійская музычная акадэмія імя Язэпса Віталса (1981);
Месца працы	Беларуская дзяржаўная філармонія;
Музычная дзейнасць
Прафесіі	музыкант

Канстанцін Канстанцінавіч Шараў (18 студзеня 1954, Мінск — 8 кастрычніка 2017) — беларускі арганіст, у 1983—2017 гадах — саліст Беларускай дзяржаўнай філармоніі.

Біяграфія

Нарадзіўся ў Мінску. Музычную адукацыю атрымліваў спачатку ў ССМШ пры БДК (1962—1972), потым (1973—1977) — у Беларускай дзяржаўнай кансерваторыі па класе фартэпіяна ў праф. І. Цвятаевай. У 1977—1981 гадах навучаўся ў класе аргана Латвійскай дзяржаўнай кансерваторыі ў прафесара Мікалая Ванадзіньша. Пасля вяртання ў Мінск прыняты салістам у БДФ, прыйшоўшы на змену Аляксандру Фісейскаму.

Пасля заканчэння кансерваторыі Канстанцін Шараў двойчы стажыраваўся ў Цюрыху ў Жана Гію, удзельнічаў у міжнародных фестывалях і конкурсах, у тым ліку ў 1982 г. атрымаў Гран-Пры на Міжнародным фестывалі «Musica Sacra» у Лодзі (Польшча).

За гады працы салістам Канстанцін Шараў рэалізаваў шмат канцэртных праграм, выканаўшы сотні манаграфічных канцэртаў. Асаблівай увагай К. Шараў дарыў французскую барочную і рамантычную музыку (Л.-Н. Клерамбо, Ж.-А. Гілен, Л. Маршан, С. Франк, А. Гільман, Ш.-М. Відор, К. Сен-Санс , Л. В’ерн). Пакуль у падпарадкаванні філармоніі быў касцёл св. Роха, дзе ў 1984 годзе быў усталяваны механічны орган фірмы Рыгер-Клос, гэта было асноўнае месца выступленняў артыста. Пасля перадачы будынка касцёла каталіцкай царкве (2006), Канстанцін Шараў стаў рэгулярна выступаць у Вялікай зале БДФ, а таксама ў касцёле Св. Сымона і Алены, дзе з’явіўся электронны арган.

Акрамя Мінску, Канстанцін Шараў канцэртаваў ва ўсіх канцэртных залах Беларусі (Полацкі Сафійскі сабор, Гродзенскі кафедральны касцёл, Віцебская філармонія, канцэртная зала і кафедральны касцёл у Пінску, касцёлы ў Магілёве, Брэсце, Паставах і іншых населеных пунктах), а таксама праводзіў замежныя гастролі (Германія, Польшча, Украіна, Малдова, Расія). Арганіст творча супрацоўнічаў з многімі вядомымі выканаўцамі: дырыжорамі, вакалістамі, інструменталістамі. Сярод іх — Аляксандр Анісімаў, Юрый Яфімаў, Юрый Цырук, Марыя Біешу, Святлана Данілюк, Таццяна Грындэнка і іншыя.

Шмат гадоў Канстанцін Шараў быў членам (клавесіністам і арганістам) ансамбля старадаўняй музыкі Кантабіле, з якім гастраляваў па Беларусі і за мяжой. Для патрэб ансамблевага музыкавання Канстанцін Шараў выканаў мноства транскрыпцый, адаптацый і рэдакцый старадаўняй музыкі. Пад яго рэдакцыяй ужо ў незалежнай Беларусі выйшла пэўная колькасць музычных твораў, якія паўсталі ў XVII—XVIII стагоддзі на тэрыторыі цяперашняй Беларусі.

Канстанціну Шараву належаць шматлікія запісы на беларускім радыё і тэлебачанні.

Праграмы

Усе арганныя творы І. С. Баха
Бах, яго сучаснікі і паслядоўнікі
Анталогія арганнай творчасці Д. Букстэхудэ
Партрэты кампазітараў

Вучні

Расціслаў Выграненка

Спасылкі