Малатарня

Малатарня
Дата адкрыцця (вынаходства)	1786
Медыяфайлы на Вікісховішчы

Машына для абмалоту зерня ў 1881 годзе.

Малата́рня — машына або асобная яе частка для вылучэння (аддзялення, выбіцця, вылушчэння) зерня або насення з сельскагаспадарчых культур. Першай малатарняй была прылада шатландскага машынабудаўніка Эндру Майкла, якая аддзяляла зерне ад сцябла і каласоў.

Цэп для абмалоту.

Раней збожжа звычайна аддзялялі ўручную, малацьбой (біццём) цэпам, што было працаёмка. Механізацыя паступова выжыла ручную апрацоўку збожжавых культур.

Часткова з’яўленне машын для абмалоту было прычынай бунту Свінга ў Вялікабрытаніі. Зацяжныя войны, вялікія падаткі і нізкі заробак вымусілі сялян урэшце ўзняцца на барацьбу ў 1830 годзе. Сяляне сталі беспрацоўнымі на некалькі гадоў з прычыны шырокага ўжывання і распаўсюджання малатарных машын.

Ёсць малатарні для малацьбы збожжа, лёну, канапель, кукурузы і іншых культур. Паводле канструкцыі малатарні бываюць простыя (толькі абмалочваюць) і складаныя (абмалочваюць, ачышчаюць і сартуюць зерне). У льно-, каноплеўборачных і збожжавых камбайнах малатарні — асобныя апараты, якія працуюць зладжана з іншымі механізмамі.