Малы пінгвін[1] (Eudyptula minor) — від птушак з сямейства пінгвінавых (Spheniscidae), адзіны ў родзе малых пінгвінаў (Eudyptula). Самы дробны від з усіх пінгвінаў, якія жывуць на планеце: у розных падвідаў памеры адрозніваюцца, сярэдні рост — 33 см, даўжыня — 43 см.
Даўжыня цела малога пінгвіна вагаецца ў дыяпазоне ад 30 да 40 см, а сярэдняя маса — 1,5 кг. У малых пінгвінаў сіняя галава, верх спіны і крылы. Задняя частка цёмная, амаль чорная, а грудзі і верх лап — светла-шэрыя або белыя. Дзюба цёмна-шэрая, 3-4 см даўжынёй. Радужка вачэй серабрыста- або сінявата-шэрая або светла-карычневая. Лапы зверху светла-ружовыя, з чорнымі падэшвамі, плавальнай перапонкай і кіпцюрамі. Маладыя птушкі маюць больш кароткую дзюбу і афарбаваны святлей.
Арэал малых пінгвінаў — узбярэжжа Новай Зеландыі (астравы Чатэм уключна) і паўднёвай частцы Аўстраліі. Аўстралійскія калоніі малых пінгвінаў існуюць у штатах Вікторыя, Заходняя Аўстралія, Новы Паўднёвы Уэльс, Тасманія, Паўднёвая Аўстралія, на тэрыторыі Джэрвіс-Бэй і на прыбярэжных астравах. На невялікім востраве Бэйбел (штат Тасманія) жывуць прыкладна 20 000 пар, каля 2 % сусветнай папуляцыі. Ёсць звесткі аб магчымых сустрэчах у Чылі. Сусветная папуляцыя малых пінгвінаў ацэньваецца прыблізна ў 1 мільён пар.
На беразе малыя пінгвіны селяцца ў расколінах на схілах. Жывуць яны парамі, якія доўга захоўваюць вернасць адзін аднаму, часам і на ўсё жыццё. Аднак палююць самец і самка звычайна паасобку. На аўстралійскім востраве Філіп-Айлэнд, за 150 км ад Мельбурна яны аблюбавалі шчыльны пясчаны схіл, які зарос невялікім хмызняком, у якім рыюць норы на адлегласці 200—500 метраў ад берага. На гэтым востраве збудаваны спецыяльныя трыбуны і насцілы, прыўзнятыя на 1-1,5 м над зямлёй, якія дазваляюць назіраць так званы «парад пінгвінаў» — Phillip Island Penguin Parade, калі яны пасля заходу сонца выходзяць з мора, фармуюць групы па 10-40 штук і вельмі хутка «маршыруюць» уверх па і параўнальна меладычна перакрыкваючыся адзін з адным і са сваімі птушанятамі. Яйцы (іх звычайна два) самец і самка выседжваюць па чарзе па некалькі дзён. Птушанят кормяць, адрыгаючы паўперавараную рыбу.
