Медаль Нахімава

Медаль Нахімава
Краіна	СССР
Тып	медаль
Дата заснавання	3 сакавіка 1944
Статус	не ўручаецца
Статыстыка ўзнагароджанняў
Колькасць	каля 13 000
Характарыстыкі
Матэрыял	бронза
Памеры	дыяметр — 36 мм
Чарговасць узнагарод
Старэйшая	Медаль «За баявыя заслугі»
Малодшая	Медаль «За працоўную доблесць»
Медыяфайлы на Вікісховішчы

Меда́ль Нахі́мава — дзяржаўная ўзнагарода СССР. Заснаваны Указам Прэзідыума ВС СССР ад 3.03.1944 «Аб заснаванні ваенных медалёў: медаль Ушакова і медаль Нахімава». Указам Прэзідыума Вярхоўнага Савета РФ ад 2 сакавіка 1992 года № 2424-1 медаль пакінуты ў сістэме ўзнагарод РФ да ўступлення ў сілу Указа Прэзідэнта РФ ад 2 сакавіка 1994 года № 442 «Аб дзяржаўных узнагародах Расійскай Федэрацыі».

Медаль выкананы па праекце архітэктара М. А. Шэпілеўскага.

Статут медаля Нахімава

Медалём Нахімава ўзнагароджваліся матросы і салдаты, старшыны і сяржанты, мічманы і прапаршчыкі Ваенна-Марскога Флоту і марскіх частак пагранічных войскаў.

Узнагароджанне медалём Нахімава ажыццяўлялася:

• за ўмелыя, ініцыятыўныя і смелыя дзеянні, якія спрыялі паспяховаму выкананню баявых задач караблёў і часцей на марскіх тэатрах;
• за мужнасць, праяўленую пры абароне дзяржаўнай марской граніцы СССР;
• за самаадданасць, праяўленую пры выкананні воінскага абавязку, або іншыя заслугі падчас праходжання сапраўднай ваеннай службы ва ўмовах, спалучаных з рызыкай для жыцця.

Медаль Нахімава носіцца на левым боку грудзей і пры наяўнасці іншых медалёў СССР размяшчаецца пасля медаля «За баявыя заслугі».

Усяго было выраблена звыш 13 000 узнагароджанняў медалём Нахімава.

Палажэнне аб медалі змянялася ў 1947 і 1980 гадах.

Апісанне

Медаль Нахімава круглы дыяметрам 36 мм, з бронзы. Аўтары праектнага малюнка мастакі А. Л. Дыёраў, Б. М. Хоміч, М. А. Волкаў. Існуе толькі адзін тып медаля. Медаль вырабляўся з бронзы, з двух асобных дэталяў. Вушка да медаля мацавалася метадам паяння.

На адным боку змешчана рэльефная выява Нахімава ў профіль. Уздоўж краёў медаля — надпіс «Адмирал Нахимов». Ніжэй профіля Нахімава — дзве лаўровыя галіны, на перакрыжаванні якіх пяціканцовая зорачка. Па краях медаля — выпуклыя кропкі.

На адваротным боку медаля — выпуклы малюнак паруснага карабля, абрамленая кольцам з троса, накладзенага на два перакрыжаваныя якара. Круг з выявай карабля і якара апраўлены якарным ланцугом. Па краях медалі — выпуклыя кропкі.

У верхняй частцы медаля зроблена вушка, якім медаль пры дапамозе кольца злучаны з металічнай пяцівугольнай калодкай. На адваротным боку калодкі ёсць прыстасаванне для мацавання медаля да адзежы. Калодка абцягнутая шаўковай муаравай стужкай сіняга колеру з трыма белымі падоўжнымі палосамі шырынёй 3 мм кожная. Адлегласць паміж белымі палосамі 2 мм, адлегласць паміж белай паласой і краем стужкі 5,5 мм Агульная шырыня стужкі 24 мм.

Літаратура

• Володин А. Н., Мерлай Н. М. Медали СССР. — СПб.: Печатный двор, 1997. — С. 78—79. — ISBN 5-7062-0111-0.
• Колесников Г. А., Рожков А. М. Ордена и медали СССР. — Мн.: Народная асвета, 1986. — С. 60—61.

Спасылкі

• Медаль Нахімава Архівавана 27 верасня 2007.
• Медаль Нахімава