Мост Нотр-Дам

З пляцоўкі Вікіпедыя
Jump to navigation Jump to search
Мост Нотр-Дам

Мост Нотр-Дам (фр.: Pont Notre-Dame) — мост у IV акрузе Парыжа праз раку Сену. Мост лічыцца адным з самых старых у Парыжы, але, у адрозненні ад іншага старога моста Пон-Нёфа, шмат разоў разбураўся і будаваўся нанова.

Канструкцыя[правіць | правіць зыходнік]

  • Тып: аркавы мост.
  • Даўжыня: 105 м.
  • Шырыня: 20 м.
  • Пабудаваны: 19101914 (у сучасным выглядзе).

Гісторыя[правіць | правіць зыходнік]

Першы мост на гэтым месцы быў пабудаваны яшчэ ў антычнасці пад назваю Вялікі мост (фр.: Grand-Pont). Калі ў 52 да н.э. Ціт Лабіен з сваёй арміяй падыходзіў да Парыжа, ён быў спалены парызіямі, каб перакрыць рымлянам шлях на востраў Сітэ. Рымляне адбудавалі мост з каменя і правялі праз яго дарогу ад Суасона да Арлеана. У 886 г. ён быў разбураны падчас асады горада нарманамі, а на гэтым месцы быў перакінуты невялікі драўляны мост Pont des Planches de Milbray, знішчаны паводкай 1406. 31 мая 1412 па загаду караля Францыі Карла VI пачалося будаўніцтва драўлянага моста Нотр-Дам, які абваліўся 25 кастрычніка 1499 з-за адсутнасці рамонту.

Знос дамоў на мосце Нотр-Дам, 1786. Карціна Юбэра Рабера

У 1507 была скончаная новая канструкцыя моста па праекце італьянскага архітэктара Джавані Джаконда, хутка забудаваная дамамі і крамамі. У 1660 яго перабудавалі ў гонар вяселля караля Людовіка XIV і Марыі Тэрэзіі. У 17461788 усе будынкі з моста былі знесены з-за пагрозы абвальвання. У 1853 адбылася чарговая перабудова, пасля якой мост стаў пяціаркавым. У 18911910 тут здарылася больш за 35 катастроф на баржах, пасля чаго ён атрымаў мянушку Мост Д'ябла (фр.: Pont du Diable). У 19101914 па праекце архітэктара Луі Рэзаля тры цэнтральныя аркі былі замененыя адзінай металічнай канструкцыяй, каб аблегчыць праход суднам. Мост быў адкрыты прэзідэнтам Райманам Пуанкарэ ў 1919 і захаваў свой выгляд да нашага часу.