Мыш-малышка (Micromys minutus) — млекакормячая жывёла сямейства мышападобных.
Даўжыня цела — 6—7, хваста 5—7 см, маса каля 5 г (самы дробны грызун на Беларусі). Поўсць ад пясочна-вохрыстай да буравата-аліўкавай, на бруху светлая.
Водзіцца на палях, лугах, балотах, у лесе, зімой трапляецца ў пабудовах, сціртах саломы; на Беларусі нешматлікая. Жыве ў шарападобных гнёздах з травінак, звычайна замацаваных на сцяблах раслін. Корміцца насеннем і зялёнымі часткамі раслін. За год дае некалькі прыплодаў па 4—8 мышанят у кожным.
