Насельніцтва Літвы

Колькасць насельніцтва Літвы, 1915-2014

Літву насяляе каля 2,8 млн чал (2018). Гэта ў два разы больш за Эстонію, у паўтара — за Латвію.

Дэмаграфія

Да пачатку 1990-х насельніцтва павялічвалася і на сваім піку (1990-1991) дасягнула 3,7 млн чал. Пасля распаду СССР і ўступлення Літвы ў ЕС насельніцтва краіны паменшылася на 0,9 млн чал. або на 25 % і працягвае памяншацца. Падобныя тэмпы дэпапуляцыі ў свеце толькі ў Латвіі і Балгарыі. Змяншэнне насельніцтва мае пад сабою два складнікі: перавышэнне смяротнасці (14,6 на адну тысячу) над нараджальнасцю (9,9) і міграцыйны адток у краіны Заходняй Еўропы (-6). Такім чынам, тэмп змяншэння насельніцтва Літвы ў 2017 склаў -1,1 %. Сярэдні ўзрост літоўцаў — 43,7 гады, доля асоб старэйшых за 65 гадоў наблізілася да 20 %.

Этнічны склад

86,7 % насельніцтва Літвы належаць да этнічных літоўцаў, якія размаўляюць па-літоўску (літоўская мова — адна з дзвюх жывых балтыйскіх моў), на дзяржаўнай мове краіны. Найбольш значныя нацыянальныя меншасці: палякі (5.6 %), рускія (4.8 %), беларусы (1.3 %). Традыцыйнай рэлігіяй Літвы з'яўляецца каталіцтва.

Рэлігіі

Не менш за 77 % літоўцаў з'яўляюцца каталікамі. Пратэстанцкая супольнасць складае 1,9 % ад агульнага насельніцтва. Пратэстанты кампактна жывуць у паўночнай і заходняй частках Літвы. Таксама ў краіне жывуць наступныя рэлігійныя меншасці: праваслаўныя, 4,9 % насельніцтва (у асноўным рускія), іудзеі, мусульмане, бахаі, караімы (старажытнае адгалінаванне ад іудаізму, прадстаўленае ў Літве суполкай з Тракая), якія разам складаюць каля 1,6 % насельнікаў краіны.

Рассяленне

20 найбуйнейшых гарадоў Літвы

Насельніцтва размешчана па тэрыторыі краіны даволі раўнамерна. У 2018 крыху больш за дзве траціны літоўцаў (67,7 %) пражываюлі ў гарадах. Асноўны прыток насельніцтва з вёсак у гарады прыйшоўся на савецкія часы, аднак ён працягваўся і пасля, асабліва дзякуючы праграме развіцця рэгіянальных цэнтраў, такіх як Марыямпале, Алітус, Мажэйкяй і інш. Самыя буйныя гарады Літвы (па звестках на 2015 г.):

1. Вільнюс — 542 932 жых.
2. Каўнас — 299 912 жых.
3. Клайпеда — 155 812 жых.
4. Шаўляй — 103 969 жых.
5. Панявежыс — 94 028 жых.

У вялікіх гарадах асабліва заўважна дэпапуляцыя. Так насельніцтва Каўнаса, Клайпеды, Шаўляя, Паневяжыса ў 2010—2015 гадах зменшылася на 15-20 тыс. чалавек у кожным горадзе.