Палявыя шпаты

Палявыя шпаты
Фізічныя ўласцівасці
Колер рысы	RAL 9002[d]
Цвёрдасць	6
Медыяфайлы на Вікісховішчы

Палявыя шпаты — група сілікатных пародаўтваральных мінералаў, аб’яднаных падобнай структурай, хімічным складам і фізічнымі ўласцівасцямі. Змяшчаюцца ў магматычных, метамарфічных і асадкавых горных пародах. Сярод распаўсюджаных палявых шпатаў — артаклаз (KAlSi₃O₈), альбіт (NaAlSi₃O₈) і анартыт (CaAl₂Si₂O₈).

Зямная кара складаецца больш чым на палову з палявых шпатаў. У кантынентальнай кары яны прысутнічаюць у саставе такіх магматычных парод як граніт, дыярыт і гранадыярыт. У акіянічнай кары іх можна знайсці ў складзе габра і базальту. Дзякуючы працэсам выветрывання і метамарфізму, палявыя шпаты з магматычных парод пераходзяць у асадкавыя і метамарфічныя.

Агульная хімічная формула палявых шпатаў — X(Al,Si)₄O₈. На месцы X часта выступаюць іоны калію (K+), натрыю (Na+) або кальцыю (Ca++). Існуюць таксама вельмі рэдкія палявыя шпаты з іонамі барыю (Ba++), рубідыю (Rb+), стронцыю (Sr++) або жалеза (Fe++).

Выкарыстоўваюцца ў вытворчасці шкла і керамікі, а таксама як напаўняльнікі для фарбаў, пластмасы і гумы. Некаторыя палявыя шпаты разглядаюцца як каштоўныя камяні, напрыклад месяцавы камень, сонечны камень, лабрадор, амазаніт і спектраліт.