Партызанская брыгада імя П. К. Панамарэнкі (Я. П. Урбановіч, М. У. Сенькін)

Партызанская брыгада імя П. К. Панамарэнкі
Гады існавання	1943—1944
Краіна	СССР Беларуская ССР
Падпарадкаванне	Беларускі штаб партызанскага руху
Уваходзіць у	Брэсцкае партызанскае злучэнне
Тып	партызаны
Функцыя	змаганне з акупантамі
Дыслакацыя	Бярозаўскі, Косаўскі, Пружанскі, Ружанскі, Слонімскі раёны
Войны	Другая сусветная вайна Вялікая Айчынная вайна
Удзел у	Вялікая Айчынная вайна
Камандзіры
Вядомыя камандзіры	Язэп Паўлавіч Урбановіч Мікалай Уладзіміравіч Сенькін

Партызанская брыгада імя П. К. Панамарэнкі — партызанская брыгада, створаная ў чэрвені 1943 года. Дзейнічала на акупіраванай тэрыторыі Бярозаўскага, Косаўскага, Пружанскага, Ружанскага, Слонімскага раёнаў.

Склад

Брыгада была створана на базе атрадаў імя Дзімітрава (арганізаваны ў красавіку 1942), імя Суворава, імя Кірава (арганізаваны ў лютым 1943), імя Чкалава, «Савецкая Беларусь» (арганізаваны ў верасні 1942) і дыверсійнай групы М. Ф. Новіка. У чэрвені — жніўні былі створаны атрады імя Дзмітрыя Пажарскага (пазней імя А. І. Калупаева) і імя Гастэла.

29 жніўня 1943 года атрады імя Суворава, імя Дзмітрыя Данскога і імя Чкалава былі пераданы для арганізацыі брыгады «Савецкая Беларусь».

Камандаванне

Камандзіры

• Язэп Паўлавіч Урбановіч (чэрвень — ліпень 1943, выконваў абавязкі);
• Мікалай Уладзіміравіч Сенькін (ліпень 1943 — ліпень 1944).

Камісары

• Сцяпан Філіпавіч Пацяруха (чэрвень — ліпень 1943);
• Канстанцін Дзям’янавіч Талочка (верасень — лістапад 1943, загінуў);
• Мірон Емяльянавіч Крыштафовіч (лістапад 1943 — ліпень 1944).

Начальнікі штаба

• Рыгор Кузьміч Дарафееў (ліпень — верасень 1943);
• Цімафей Спірыдонавіч Коваль (верасень 1943 — ліпень 1944).

Гісторыя

Баявыя дзеянні партызаны праводзілі на чыгунках і шашэйных дарогах, зрывалі перавозкі, знішчалі баявую тэхніку і жывую сілу, маёнткі, апорныя пункты праціўніка. У красавіку 1943 года разбілі гарнізон у вёсцы Харошча Косаўскага раёна, у лістападзе вялі баі з карнікамі каля вёскі Бялавічы Косаўскага раёна, у лютым 1944 разбілі гарнізон у вёсцы Баравікі Слонімскага раёна.

Вясной 1943 года ў атрад імя В. П. Чкалава перайшоў радавы нямецкай арміі Феранц Малдавані, венгр па паходжанні.

11 ліпеня 1944 года партызанская брыгада (1537 партызан, атрады «Савецкая Беларусь», імя Дзімітрава, імя Кірава, імя Гастэлы) злучылася з Чырвонай Арміяй.

Памяць

У 1975 годзе каля вёскі Смаляніца Пружанскага раёна ў гонар брыгады быў пастаўлены помнік.

Літаратура

• Беларусь у Вялікай Айчыннай вайне, 1941—1945: Энцыкл. / Рэдкал.: І. П. Шамякін (гал. рэд.) і інш. — Мн.: БелСЭ, 1990. — 680 с. — 20 000 экз. — ISBN 5-85700-012-2.

Спасылкі

• Бригада им. П. К. Пономаренко Архівавана 17 лістапада 2020.