Парыжскі мір (1783)

«Парыжскі мір», групавы партрэт працы Бенджаміна Уэста (1738—1820). На партрэце, сярод іншых, намаляваны Бенджамін Франклін і Джон Адамс. Члены брытанскай дэлегацыі адмовіліся пазіраваць Уэсту, і партрэт застаўся няскончаным.

Парыжскі мір, 1783 — падпісаны ў Версалі 3 верасня 1783 года паміж ЗША і іх саюзнікамі — Францыяй, Іспаніяй і Нідэрландамі, з аднаго боку, і Вялікабрытаніяй — з другога. Завяршыў пераможную для ЗША Вайну за незалежнасць у Паўночнай Амерыцы 1775-83. Парыжскі мір аб'яднаў прэлімінарныя мірныя дагаворы, падпісаныя Вялікабрытаніяй з ЗША і іх саюзнікамі ў 1782-83: 1) па прэлімінарным мірным дагаворы паміж Вялікабрытаніяй і ЗША ад 30 лістапада.

1782 Вялікабрытанія прызнавала ЗША суверэннай і незалежнай дзяржавай (межы былі зафіксаваныя адмысловымі артыкуламі дагавора) і адмаўлялася ад усіх прэтэнзій да іх у будучыні. Яна абавязвалася вывесці свае войскі, гарнізоны і караблі з усіх пунктаў і партоў ЗША. Прадугледжвалася свабоднае плаванне грамадзян абедзвюх краін па Місісіпі. 2) Па прэлімінарным мірным дагаворы Вялікабрытаніі з Францыяй і Іспаніяй ад 20 студзеня 1783 года Вялікабрытанія саступала Францыі востраў Табага ў Вест-Індыі і вяртала Сенегал у Афрыцы; Іспанія атрымлівала назад востраў Менорка ў Міжземным моры; ў Індыі Францыя і Вялікабрытанія вярнулі адзін аднаму ўсе тэрыторыі, захопленыя падчас вайны. 3) Па прэлімінарным мірным дагаворы з Нідэрландамі ад 2 верасня 1783 года Вялікабрытанія атрымлівала галандскую факторыю ў Індыі - Негапатам.