Плешчаніцкае вадасховішча

Плешчаніцкае вадасховішча, Войкаўскае вадасховішча — вадасховішча ў Лагойскім раёне Мінскай вобласці. Плошча 2,04 км². Найбольшая глыбіня 6,3 м. Даўжыня 2,9 км. Найбольшая шырыня 0,9 км. Даўжыня берагавой лініі 7,3 км. Аб'ём вады 5,1 млн м³. Плошча вадазбору 232 км². На р. Дзвінаса (34 км ад вусця), за 24 км на поўнач ад г.п. Лагойск, каля заходняй ускраіны г.п. Плешчаніцы. Створана ў 1960 годзе для рэгулявання рачнога сцёку, рэкрэацыі і спартыўных мерапрыемстваў. Берагі пад лесам, правы забалочаны, левы высокі (1,5- 3 м). Дно выслана ілам, на мелкаводдзі пяском. Сярэднегадавое ваганне ўзроўню 50 см. Замярзае ў пачатку снежня, лёд (таўшчыня 40-50 см) трымаецца да 2-й паловы сакавіка. Інтэнсіўна зарастае, асабліва ў верхняй частцы і ў заліве. Упадаюць рэкі Дрылянка і Рудаўка.

Літаратура

• Блакітная кніга Беларусі : Энцыклапедыя / рэдкал.: Н. А. Дзісько і інш. — Мн.: БелЭн, 1994. — 415 с. — 10 000 экз. — ISBN 5-85700-133-1.