Пераламленне святла

Праламленне праменя на мяжы двух асяроддзяў

Вымярэнне вуглоў падзення і пераламлення прамяня святла

Пераламле́нне святла́ — змена напрамку распаўсюджвання аптычнага выпраменьвання (святла) пры яго праходжанні праз мяжу падзелу двух асяроддзяў.

Апісанне з'явы

Для працяглай плоскай мяжы падзелу аднародных ізатропных асяроддзяў пераломлены прамень ляжыць у адной плоскасці з падаючым праменем і нармаллю да мяжы падзелу. Вуглы падзення $\alpha$ і пераламлення $\beta$ падпарадкоўваюцца закону Снеліуса:

${\frac {\sin \alpha }{\sin \beta }}={\frac {n_{2}}{n_{1}}}$,

дзе $n_{1}$ і $n_{2}$ — абсалютныя паказчыкі пераламлення першага і другога асяроддзяў адпаведна.

Пераламленне святла заўсёды суправаджаецца адбіццём святла. Суадносіны інтэнсіўнасцей падаючага, адбітага і пераломленага праменяў залежаць ад вуглоў падзення і пераламлення, а таксама ад палярызацыі падаючага праменя (гл. Формулы Фрэнеля). Пры любых вуглах падзення, адрозных ад 0, пераламленне святла суправаджаецца зменай стану палярызацыі, што выкарыстоўваецца для атрымання лінейна-палярызаванага святла (гл. Закон Брустара).

Выкарыстанне

На законах пераламлення святла заснавана будова аптычных прылад, якія служаць для змены напрамку светлавых праменяў і атрымання аптычных відарысаў, напрыклад: мікраскопаў, тэлескопаў, спектрографаў, фотаапаратаў.

Літаратура

• В. В. Валяўка. Пераламленне святла // Беларуская энцыклапедыя: У 18 т. Т. 12: Палікрат — Праметэй / Рэдкал.: Г. П. Пашкоў і інш. — Мн. : БелЭн, 2001. — Т. 12. — С. 278. — 576 с. — 10 000 экз. — ISBN 985-11-0035-8. — ISBN 985-11-0198-2 (т. 12).
• Болсун А. Н. Краткий словарь физических терминов / Сост. А. И. Болсун. — Мн.: Вышэйшая школа, 1979. — С. 276. — 416 с. — 30 000 экз. (руск.)
• Преломление волн — артыкул з Фізічнай энцыклапедыі

Спасылкі

• На Вікісховішчы ёсць медыяфайлы па тэме Пераламленне святла