Беларуская рэспубліканская навукова-метадычная рада па пытаннях гісторыка-культурнай спадчыны
Беларуская рэспубліканская навукова-метадычная рада па пытаннях гісторыка-культурнай спадчыны пры Міністэрстве культуры Беларусі з’яўляецца навукова-метадычным органам па пытаннях уліку, захавання, аднаўлення, утрымання і выкарыстання гісторыка-культурных каштоўнасцей, што ажыццяўляюцца ў мэтах зберажэння і памнажэння гісторыка-культурнай спадчыны Рэспублікі Беларусь.
Задачы і кампетэнцыі[правіць | правіць зыходнік]
Асноўнымі задачамі Навукова-метадычнай рады з’яўляюцца:
- навукова-метадычнае забеспячэнне аховы гісторыка-культурнай спадчыны;
- выпрацоўка прапаноў, рэкамендацый па комплексу пытанняў аховы гісторыка-культурнай спадчыны.
Да кампетэнцыі Навукова-метадычнай рады адносіцца:
- прыняцце рашэнняў аб неабходнасці надання матэрыяльным аб’ектам і нематэрыяльным праяўленням творчасці чалавека статусу гісторыка-культурнай каштоўнасці або аб адсутнасці неабходнасці надання ім такога статусу;
- прыняцце рашэнняў аб немагчымасці навукова абгрунтаванага аднаўлення гісторыка-культурных каштоўнасцей у выпадку страты імі сваіх адметных духоўных, мастацкіх і (або) дакументальных вартасцей, якія абумовілі наданне ім статусу гісторыка-культурнай каштоўнасці, а таксама ў выпадку іх знішчэння, страты ці знікнення ў выніку ўздзеяння прыродных фактараў або іншых сітуацый;
- разгляд прапаноў аб наданні матэрыяльнаму аб’екту або нематэрыяльнаму праяўленню творчасці чалавека статусу гісторыка-культурнай каштоўнасці, які ўключае разгляд фіксацыі, навуковую апрацоўку і мастацкую ацэнку матэрыяльнага аб’екта або нематэрыяльнага праяўлення творчасці чалавека, для прыняцця рашэння аб неабходнасці надання матэрыяльнаму аб’екту або нематэрыяльнаму праяўленню творчасці чалавека статусу гісторыка-культурнай каштоўнасці;
- прыняцце рашэнняў аб неабходнасці аднясення гісторыка-культурнай каштоўнасці да пэўнай катэгорыі або аб неабходнасці змянення яе катэгорыі;
- разгляд распрацаванай у адпаведным парадку навукова-праектнай дакументацыі на выкананне рэстаўрацыйна-аднаўленчых работ на матэрыяльных гісторыка-культурных каштоўнасцях катэгорый «0», «1», «2» і яе адабрэнне або неадабрэнне;
- выдача рашэнняў аб адпаведнасці кваліфікацыйным патрабаванням кандыдатаў на атрыманне пасведчанняў на кіраўніцтва распрацоўкай навукова-праектнай дакументацыі на выкананне рэстаўрацыйна-аднаўленчых работ на матэрыяльных гісторыка-культурных каштоўнасцях і (або) у зонах аховы нерухомых матэрыяльных гісторыка-культурных каштоўнасцей;
- выдача заключэнняў аб поўным вывучэнні помнікаў археалогіі;
- выкананне іншых функцый у адпаведнасці з Законам.
Склад і арганізацыя[правіць | правіць зыходнік]
У склад Навукова-метадычнай рады ўваходзяць прадстаўнікі рэспубліканскіх органаў дзяржаўнага кіравання, мясцовых выканаўчых і распарадчых органаў, арганізацый, якія ў сваёй дзейнасці маюць адносіны да арганізацыйных, навуковых, інфармацыйных і іншых пытанняў, што закранаюць сферу аховы гісторыка-культурнай спадчыны.
Навукова-метадычную раду ўзначальвае старшыня, а ў яго адсутнасць — намеснік старшыні. Старшыня кіруе дзейнасцю Навукова-метадычнай рады, склікае пасяджэнні, арганізуе яе работу, вызначае шэраг іншых пытанняў, якія падлягаюць разгляду на пасяджэннях і зацвярджае іх.
Пасяджэнні Навукова-метадычнай рады праводзяцца па меры неабходнасці, але не радзей аднаго разу ў месяц. Навукова-метадычная рада правамоцна прымаць рашэнні пры наяўнасці на пасяджэнні не менш за 2/3 яе складу. Рашэнні лічацца прынятымі, калі за яе рашэнне прагаласавала больш за палавіну прысутных на пасяджэнні членаў Навукова-метадычнай рады. Пры роўнасці галасоў прынятым лічыцца рашэнне, за якое прагаласаваў старшыня, а ў яго адсутнасць — намеснік старшыні. Старшыня мае права афіцыйна запрашаць для ўдзелу ў яе рабоце экспертаў, прадстаўнікоў мясцовых выканаўчых і распарадчых органаў, праектных устаноў, іншых зацікаўленых у вырашэнні пытанняў, якія датычацца гісторыка-культурных каштоўнасцей і разглядаюцца на пасяджэннях.
Спасылкі[правіць | правіць зыходнік]
- Палажэнне аб Беларускай рэспубліканскай навукова-метадычнай радзе па пытаннях гісторыка-культурнай спадчыны пры Міністэрстве культуры. Зацверджанае Пастановай Савета Міністраў Рэспублікі Беларусь 15.06.2006 № 762