Раіса Мікалаеўна Жук-Грышкевіч

Раіса Мікалаеўна Жук-Грышкевіч
Род дзейнасці	стаматолаг, грамадскі дзеяч
Дата нараджэння	22 кастрычніка 1919(1919-10-22)
Месца нараджэння	Пружаны, Пружанскі павет, Гродзенская губерня, Расійская імперыя
Дата смерці	9 красавіка 2009(2009-04-09) (89 гадоў)
Месца смерці	Бары
Месца пахавання	Беларускія могілкі ў Іст-Брансуіку
Муж	Вінцэнт Антонавіч Жук-Грышкевіч
Альма-матар	Гімназія імя Адама Міцкевіча[d] Віленская беларуская гімназія Таронцкі ўніверсітэт
Член у	Згуртаванне беларусаў Канады Каардынацыйны камітэт беларусаў Канады Задзіночанне беларускіх жанчын Канады[d] Беларускі інстытут навукі і мастацтва Міжнародная асацыяцыя беларусістаў
Раіса Мікалаеўна Жук-Грышкевіч на Вікісховішчы

Раі́са Мікала́еўна Жук-Грышке́віч (дзявочае Жукоўская; 22 кастрычніка 1919, Пружаны, цяпер Брэсцкая вобласць — 2 красавіка 2009, Бары, Канада) — беларуская грамадская дзяячка.

Біяграфія

Хата ў Пружанах па вул. Горка, дзе нарадзілася Раіса Жукоўская

Выпускнікі пружанскай гімназіі імя Адама Міцкевіча перад матурай. Другая справа ў ніжнім шэрагу — Раіса Жук-Грышкевіч

Нарадзілася Раіса Жукоўская 22 кастрычніка 1919 года ў Пружанах у сям’і Міколы Жукоўскага і Надзеі Меярэвіч. Скончыла тут польскую пачатковую школу і гімназію імя Адама Міцкевіча. У 1938 годзе паступіла ў Віленскую беларускую гімназію. Пасля прыходу ў Заходнюю Беларусь бальшавікоў працавала настаўніцай беларускай мовы ў Пружанах, пасля была накіравана ў Смаляніцу.

У 1942 годзе выехала ў Германію, працавала ў «Вінэце». Пасля сканчэння вайны трапіла ў лагер для перамешчаных асоб брытанскай акупацыйнай зоны ў горадзе Ватэнштэце. Тут Раіса была сцяжной жаночага скаўтынгу і пэўны час працавала ў лякарні. Потым выехала ў Марбург вучыцца на дантыстку.

У 1949 годзе з’ехала ў Канаду. Паколькі еўрапейскія дыпломы ў галіне медыцыны там не прызнаваліся, вымушаная была вучыцца наноў. У 1954 годзе скончыла ўніверсітэт у Таронта і атрымала дыплом доктара дантычнай хірургіі. Адначасна з вучобай на дантыста наведвала курсы беларусазнаўства, адкрытыя пры ўніверсітэце В. Жук-Грышкевічам. Працавала стаматолагам да 1990 года.

4 верасня 1953 выйшла замуж за доктара Таронцкага ўніверсітэта Вінцука Жук-Грышкевіча, які быў тады заступнікам Старшыні Рады Беларускай Народнай Рэспублікі Міколы Абрамчыка.

З першых дзён жыцця ў Канадзе стала сябрам Згуртавання беларусаў Канады, была сярод яго заснавальнікаў. Шмат гадоў узначальвала Каардынацыйны камітэт беларусаў Канады, выдавала яго друкаваны орган «Камунікаты». У 1965—1975 гадах узначальвала Задзіночанне беларускіх жанчын Канады, была сакратаром-скарбнікам Беларускага інстытута навукі і мастацтва ў Канадзе, сябрам Міжнароднай асацыяцыі беларусістаў. У 1973 г. як прадстаўнік ад беларускай этнічнай групы ўведзена канадскім урадам у Кансультацыйную Раду па пытаннях мультыкультуралізму. Ад 1978 года сяброўка Рады БНР. Разам з мужам у 1988 годзе ў Мідлендзе на плошчы Мучанікаў усталявалі Памятны крыж тысячагоддзя хрысціянства ў Беларусі. З 1997 года — член Прэзідыума Рады БНР.

Выдала кнігі «Жыццё Вінцэнта Жук-Грышкевіча» (Таронта, 1993) і «Род Жукоўскіх-Меярэвічаў». У рамках Выдавецкага камітэта Згуртавання беларусаў Канады што стала прычынай выдання двух падручнікаў беларускай мовы аўтарства сястры Валянціны Пашкевіч.

У ліпені 1993 была ўдзельніцай першага з’езду беларусаў свету ў Мінску. Падчас таго прыезду ў Беларусь наведала і родныя Пружаны. У 1995 прыняла ўдзел у другім Міжнародным кангрэсе беларусістаў у Мінску.

Магіла Вінцэнта і Раісы Жук-Грышкевічаў на беларускіх могілках у Нью-Брансуіку

Раіса Жук-Грышкевіч жыла ў мясцовасці Бары, дзе памерла 2 красавіка 2009 года. 4 красавіка яе пахавалі каля мужа на беларускіх могілках у Нью-Брансуіку (штат Нью-Джэрсі, ЗША).

Літаратура

• Здановіч Іван Юльянавіч. Рупліўцы беларускага нацыянальнага адраджэння з Пружаншчыны: Грамадска-літаратурны даведнік. — Пружаны, 2003. — С. 32—34.
• Юрэвіч, Л. Шматгалосы эпісталярыум : гісторыя людзей і ідэй на эміграцыі ў ліставанні / Лявон Юрэвіч.. — (Бібліятэка Бацькаўшчыны ; кн. 20). — Мінск: Кнігазбор, 2012. — 660 с. — ISBN 978-985-7007-43-1.

Спасылкі

• На Вікісховішчы ёсць медыяфайлы па тэме Раіса Мікалаеўна Жук-Грышкевіч
• Сурвіла, Івонка Івонка Сурвіла памяці Раісы Жук-Грышкевіч. Каментары. «Наша Ніва» (21 чэрвеня 2009).
• Алесь Дашчынскі Раіса Жук-Грышкевіч. Вянок памяці. Радыё «Свабода» (21 чэрвеня 2009).