Рыбаводства

З пляцоўкі Вікіпедыя
Перайсці да: рух, знайсці
Рыбная гаспадарка (2011 г., Харватыя)

Рыбаводства — развядзенне і гадоўля рыбы праз павелічэнне і паляпшэнне якасці рыбных запасаў у прыродных і штучных вадаёмах. Бывае сажалкавае, садковае і прамысловае. Кірункі: меліярацыя і ўгнаенне сажалак для ўзмацнення іх прыроднай асновы, удасканаленне спосабаў кармлення рыбы, адбор высокапрадукцыйных парод, вырошчванне полікультур рыб. Найбольшае развіццё атрымала ў краінах з выхадам да мора і акіяна і буйнымі ўнутранымі вадаёмамі і сажалкамі (Японія, Кітай, ЗША, Расія, Данія, Канада, Швецыя, Нарвегія і Брытанія — сумарная гадавая вытворчасць звыш 10 млн. тонаў).

Беларусь[правіць | правіць зыходнік]

З 18 стагоддзя ў шляхецкіх гаспадарках развівалася гадоўля карпа і кумжы. Найбольшай была «Альба» князёў Радзівілаў пад Нясвіжам. На 1917 год у Беларусі налічвалася 856 гектараў рыбаводных сажалак, сярэдняя прадукцыйнасць якіх дасягала 0,6 цэнтнер/га. Прамысловае рыбаводства пашырылася ў 19201930-я гады з пабудовай сажалкавых гаспадарак: «Белае» (1924 г., плошча сажалак 1268 га; Жыткавіцкі раён, цяпер Гомельская вобласць), «Волма» (1932 г., 1553 га; Чэрвеньскі раён, цяп. Мінская вобласць) і «Трэмля» (400 га; Петрыкаўскі раён, цяп. Гомельская вобласць). Найбольш імкліва рыбныя гаспадаркі будаваліся ў 19601980-я гг. ў сувязі з асваеннем Палескай нізіны. Найбольш прадукцыі атрымалі ў 1989 г. (20,6 тыс. т., з іх 95 % — карп), выхад таварнай прадукцыі — 14,3 ц/га. У 2000 г. працавала 18 сажалкавых гаспадарак з агульнай плошчай 21,86 тыс. га, садкоў 20 тыс. квадратных метраў. Адна халаднаводная гаспадарка вырошчала кумжу. Таксама рыбаводствам займаліся калгасы і саўгасы і дапаможныя гаспадаркі прамысловых прадпрыемстваў. У асноўным разводзіўся карп, у дадатак — карась, раслінаедныя рыбы, шчупак і кумжа. Вытворчасць складала каля 9,3 тыс. тон. Навукова-дастасоўнай распрацоўкай займаліся Беларускі навукова-даследніцкі інстытут рыбнай гаспадаркі (БНДІРГ) і Інстытут заалогіі Нацыянальнай акадэміі навук Беларусі[1].

У 2010 г. рыбныя гаспадаркі вырасцілі 16,2 тыс. т. таварнай рыбы, з іх 79 % карпа. Рэшту склалі белы амур, таўсталобік, сом, лінь, шчупак і карась. Тым часам 196 арандатараў прыродных вадаёмаў вылавілі ў азёрах і рэках 926 тон рыбы. На 2011 г. вытворчасцю прэснаводнай рыбы займаліся 19 рыбаводчых гаспадарак магутнасцю ад 100 тон да 2,7 тысячы тон («Сялец»; Бярозаўскі раён, Брэсцкая вобласць). Звыш паловы ўсёй рыбы збывалася ў жывым выглядзе праз 212 жыварыбных аўтакрамаў[2].

Зноскі

Спасылкі[правіць | правіць зыходнік]