Рэгістрацыя кандыдата

Рэгістрацыя кандыдата — этап выбарчага працэсу, прадугледжаны выбарчым заканадаўствам Рэспублікі Беларусь і многіх іншых дзяржаў, які заключаецца ў афіцыйным пацверджанні статусу кандыдата арганізатарамі выбараў.

Рэгістрацыя кандыдатаў у Прэзідэнты Рэспублікі Беларусь ажыццяўляецца Цэнтральнай камісіяй па выбарах і правядзенні рэспубліканскіх рэферэндумаў, а кандыдатаў у дэпутаты — адпаведнай акруговай, тэрытарыяльнай выбарчай камісіяй.

Рэгістрацыя кандыдатаў у Прэзідэнты Рэспублікі Беларусь пачынаецца за 35 дзён і заканчваецца за 25 дзён да выбараў, а кандыдатаў у дэпутаты пачынаецца за 40 дзён і заканчваецца за 30 дзён да выбараў.

Адмова ў рэгістрацыі кандыдата

Падставы для адмовы ў рэгістрацыі кандыдата:

• неадпаведнасці асобы, якая вылучана кандыдатам, патрабаванням Выбарчага кодэкса;
• наяўнасць судзімасці;
• парушэнне парадку вылучэння;
• адсутнасць аднаго або некалькіх дакументаў, неабходных для рэгістрацыі кандыдата;
• недастатковая колькасць дакладных і сапраўдных подпісаў выбаршчыкаў, ці больш за 15 працэнтаў несапраўдных подпісаў ад агульнай колькасці правераных подпісаў выбаршчыкаў;
• выкарыстанне ў інтарэсах абрання грашовых сродкаў ці матэрыяльнай дапамогі замежных дзяржаў і арганізацый, замежных грамадзян і асоб без грамадзянства.

Выбарчыя камісіі маюць права адмовіць у рэгістрацыі кандыдата ў выпадку:

• прадстаўлення ў дэкларацыі аб даходах і маёмасці асобы, якая вылучана кандыдатам, не адпаведных рэчаіснасці звестак, якія маюць істотны характар;
• выкарыстання пераваг службовага становішча ў інтарэсах абрання;
• удзелу адміністрацыі арганізацыі ў зборы подпісаў выбаршчыкаў, прымусу ў працэсе збору подпісаў і ўзнагароды выбаршчыкаў за ўнясенне подпісу;
• паўторнага парушэння асобай, якая вылучаецца кандыдатам, або ініцыятыўнай групай патрабаванняў Выбарчага кодэкса і іншых актаў заканадаўства Рэспублікі Беларусь аб выбарах, калі раней ім было вынесена папярэджанне.

Адмена рэгістрацыі кандыдата

Палітычная партыя, працоўны калектыў, якія вылучылі кандыдата ў дэпутаты, маюць права не пазней чым за пяць дзён да дня выбараў адмяніць сваё рашэнне аб вылучэнні кандыдата ў дэпутаты.

Цэнтральная камісія, акруговая, тэрытарыяльная выбарчая камісія маюць права без папярэдняга папярэджання адмяніць рашэнне аб рэгістрацыі кандыдата ў выпадку:

• невыканання абмежаванняў пры правядзенні перадвыбарнай агітацыі;
• паўторнага невыканання патрабаванняў Выбарчага кодэкса і іншых актаў заканадаўства Рэспублікі Беларусь аб выбарах, калі раней было вынесена папярэджанне;
• перавышэння больш чым на 20 працэнтаў гранічнага памеру расходавання сродкаў выбарчага фонду, або выкарыстання ў гэтых жа памерах грашовых сродкаў апроч сродкаў выбарчага фонду;
• удзелу адміністрацыі арганізацыі ў зборы подпісаў выбаршчыкаў, прымусу ў працэсе збору подпісаў і ўзнагароды выбаршчыкаў за ўнясенне подпісу;
• прадстаўлення ў дэкларацыі аб даходах і маёмасці істотных звестак, якія не адпавядаюць рэчаіснасці;
• выкарыстання пераваг службовага становішча ў інтарэсах абрання;
• парушэння патрабаванняў, што прад’яўляюцца да перадвыбарнай праграмы кандыдата.

Цэнтральная камісія, акруговая, тэрытарыяльная выбарчая камісія без папярэдняга папярэджання адмяняюць рашэнне аб рэгістрацыі кандыдата ў выпадку:

• выкарыстання ў інтарэсах абрання грашовых сродкаў ці матэрыяльнай дапамогі замежных дзяржаў і арганізацый, замежных грамадзян і асоб без грамадзянства;
• страты асобай, зарэгістраваным кандыдатам, права абірацца Прэзідэнтам Рэспублікі Беларусь, дэпутатам;
• устанаўлення пасля рэгістрацыі кандыдата ў Прэзідэнты Рэспублікі Беларусь, у дэпутаты абставін, якія прадугледжваюць адмову ў рэгістрацыі.