Сага Бекер

Сага Бекер
шведск.: Saga Becker
Дата нараджэння	1988
Месца нараджэння	Eringsboda[d], камуна Роннебю, лен Блекінгэ, Швецыя
Грамадзянства	Швецыя
Прафесія	акцёр, кінаакцёр
Кар’ера	2006 - цяперашні час
IMDb	ID 6223103
Медыяфайлы на Вікісховішчы

Сага Бекер (шведск.: Saga Becker; нар. 1988, Эрынгсбада, Швецыя) — шведская актрыса і сацыяльная актывістка, уладальніца прэміі «Залаты жук» за лепшую жаночую ролю ў 2014 годзе.

Біяграфія

Бекер вырасла ў Эрынгсбадзе, Швецыя. Сага з’яўляецца старэйшым дзіцем сваіх бацькоў — у яе таксама два малодшых брата. У дзяцінстве яна ведала, што непадобная на іншых, і спрабавала стварыць свет мары, дзе яна бачыла сябе дзяўчынай, закаханай у мужчыну. У школе над ёй здзекаваліся, яна нярэдка атрымлівала пагрозы аб расправе, у выніку чаго стала піць алкаголь і галадаць. Пасля барацьбы з дэпрэсіяй і аперацыі па змене полу яна цяпер адкрыта выказвае сваё меркаванне на актуальныя тэмы і працуе над стварэннем лепшага асяроддзя для трансгендарнай супольнасці.

Жыве ў Стакгольме.

Кар’ера

Сага дэбютавала ў мастацкім фільме рэжысёра Эстэра Марціна Бергсмарка «Нешта павінна зламацца» (шведск.: Nånting måste gå sönder, за гэтую працу яна была намінаваная на прэмію «Узыходзячая зорка» (англ.: Rising Star Award) на міжнародным кінафестывалі ў Стакгольме і атрымала прэмію «Залаты жук» за лепшую жаночую ролю ў 2014 годзе.

Фільм заснаваны на рамане Элі Левена (шведск.: Du är rötterna som sover vid mina fötter och håller jorden på plats), які распавядае пра каханне паміж двума маладымі людзьмі, адзін з якіх — андрагін Себасцьян, эксцэнтрычны персанаж, летуценнік, а другі, Андрэас, усяляк не хоча прызнаваць сваю гомасексуальную арыентацыю, але ўсё ж не можа выстаяць перад абаяннем Себасцьяна.

Сага Бекер выклікала сенсацыю на ўручэнні нацыянальнай кінаўзнагароды Швецыі «Залаты жук», таму што яна стала першай у гісторыі прэміі трансгендарнай жанчынай, якая была намінаваная і атрымала галоўны прыз у катэгорыі «Лепшая жаночая роля».

У 2016 годзе Бекер прыняла ўдзел у шведскім тэлевізійным праекце «Дзяўчыны, якія мы ёсць» (шведск.: Tjejer som oss), у ім пяць трансгендарных чалавек распавядаюць пра сваё жыццё.

Удзел у сацыяльных праектах

Будучы паспяховай і запатрабаванай актрысай, Сага Бекер таксама актыўна цікавіцца важнымі сацыяльнымі праграмамі. Яна рэгулярна прымае ўдзел у кампаніях, дзе заклікае шведскую кінаіндустрыю больш задзейнічаць у здымках трансгендарных акцёраў і актрыс.

Акрамя гэтага, Сага Бекер з’яўляецца афіцыйным паслом Suicide Zero, шведскай некамерцыйнай арганізацыі, заснаванай у красавіку 2013 года, галоўнай мэтай якой з’яўляецца прадухіленне самагубстваў.