Сігурд Хокансан

Сігурд Хокансан
стар.-сканд.: Sigurðr Hákonarson
2-гі ярл Хладзіра 917 — 962
Папярэднік	Хокан Гр'ётгардсан
Пераемнік	Хокан Магутны
Нараджэнне	каля 895 Нарвегія
Смерць	962 Нарвегія
Род	Ярлы Ладэ
Бацька	Хокан Гр’ётгардсан
Маці	NN
Жонка	Бергльят Торэдотыр[d]
Дзеці	Хокан Магутны
Дзейнасць	кіраўнік

Сігурд Хокансан (стар.-сканд.: Sigurðr Hákonarson; каля 895—962) — буйны нарвежскі дваранін і другі ярл Хладзіра ва ўсходняй частцы Тронхейма, сябар і саветнік караля Нарвегіі Хокана Добрага.

Біяграфія

Нарадзіўся ў сям’і Хокана Гр’ётгардсана (каля 838—900), першага ярла Хладзіра, паплечніка і цесця караля Харальда Цудоўнавалосага, які аб’яднаў Нарвегію. Яго дачка Аса стала адной з жонак Харальда.

Хладзірскі ярл Хокан з дружынай удзельнічаў у заваявальных паходах конунга Харальда Цудоўнавалосага. У марской бітве ў Сольскеля загінулі яго сыны Гр’ётгард і Хёрлаўг. Харальд Цудоўнавалосы, падпарадкаваў сваёй уладзе Фіёрды, перадаў гэты фюльке у кіраванне Хокану. Неўзабаве Хокан пасварыўся з суседнім ярлам Атлі Худым, кіраўніком фюльке Согн, таксама прызначаным Харальдам. Хокан адправіў да Атлі ганца, запатрабаваўшы ад яго пакінуць Согн і стаць ярлам у Гаўлары, дзе ён раней кіраваў. Але Атлі Худы заявіў, што конунг Харальд даў яму ў валоданне Согн, і ён не пакіне свае ўладанні, не сустрэўшыся з Харальдам. Тады ярлы Хокан і Атлі сабралі дружыны і пачалі вайну. У бітве ў Ф’яліра ярл Хокан быў забіты, а яго праціўнік ярл Атлі Худы смяротна паранены.

Пасля дасягнення паўналецця Сігурд Хокансан атрымаў у спадчыну бацькаўскія ўладанні ў Хладзіры. У яго выхоўваліся сыны Харальда Цудоўнавалосага — Хальвдан Чорны і Сігрэд, якія раней знаходзіліся на выхаванні ў ярла Хокана, бацькі Сігурда. Яны былі амаль аднаго ўзросту, сыны Харальда і Сігурд Хокансан. Ён быў жанаты з Бергльяце, дачке ярла Торыра Маўклівага і Алаў Красы Года, дачкі конунга Харальда Цудоўнавалосага. У 892 годзе пасля смерці свайго бацькі Рэнгвальда Эйстэйнсана Торыр Маўклівы стаў ярлам у Мёры.

У часы кіравання караля Нарвегіі Хокана I Добрага (935—961) хладзірскі ярл Сігурд меў вялікі ўплыў пры каралеўскім двары, стаўшы сябрам і саветнікам маладога конунга. Ён імкнуўся, у прыватнасці, стаць пасроднікам паміж конунгам і народам падчас спробы Хокана Добрага ўвесці ў краіне хрысціянства. У бітве ля Фіцьяра ў 961 годзе конунг Хокан Добры атрымаў перамогу над сынамі Эйрыка Крывавая Сякера, але сам атрымаў смяротнае раненне. Новым каралём Нарвегіі стаў Харальд Шэрая Шкура (961—965/970), старэйшы з сыноў Эйрыка Крывавай Сякеры і пляменнік Хокана.

Увосень 962 года хладзірскі ярл Сігурд Хокансан і яго прыхільнікі былі спалены ў Эгла (сучасная вёска Skatval) па загадзе конунга Харальда Шэрай Шкуры. У змову з конунгамі Харальдам і Эрлінгам уступіў Гр’ётгард, малодшы брат Сігурда. У 970 годзе за забойства Сігурда адпомсціў яго сын Хокан Магутны, які стаў саюзнікам караля Даніі Харальда Сінязубага. Скарыстаўшыся адсутнасцю Харальда Шэрай Шкуры і яго братоў, якія адправіліся ў вікінгскі паход, Хокан Сігурдсан сабраў войскі і здзейсніў паход на Мёр, дзе ў бітве перамог і забіў свайго дзядзьку Гр’ётгарда, якога Харальд Шэрая Шкура пакінуў абараняць краіну.

Спасылкі

• Сноры Стурлусан. «Круг Зямны» Сага пра Харальда Шэрую Шкуру