Касцёл Найсвяцейшай Тройцы (Клецк)
| Славутасць | |
| Касцёл Найсвяцейшай Тройцы | |
|---|---|
 Касцёл Найсв. Тройцы, галоўны фасад | |
| 53°04′02,48″ пн. ш. 26°37′32,50″ у. д.HGЯO | |
| Краіна |
 Беларусь |
| Горад | Клецк |
| Канфесія | Рымска-каталіцкая царква |
| Архітэктурны стыль | рэнесанс |
| Архітэктар | Джавані Марыя Бернардоні |
| Заснавальнік | Андрэй Маствілоўскі |
| Дата заснавання | XVI стагоддзе |
| Дата пабудовы | XVI стагоддзе |
| Дата скасавання | 1950 |
| Стан | знішчаны |
 |
|
 Медыяфайлы на Вікісховішчы | |
Касцёл Найсвяцейшай Тройцы (таксама Фарны касцёл) — колішні каталіцкі храм-фара, які існаваў у Клецку ў XVI — першай палове XX стагоддзяў.
Гісторыя[правіць | правіць зыходнік]
.jpg)
Фарны касцёл у Клецку ў 1550 годзе фундаваў Андрэй Маствілоўскі[1]. У 1560-я гады Мікалай Радзівіл Чорны перадаў храм кальвіністам, тут з пратэстанцкімі пропаведзямі выступаў беларускі гуманіст Сымон Будны. Пры маршалку вялікім літоўскім і ўладальнікам Клецку Альбрэхце II Радзівіле зноў перададзены каталікам. У 1607 годзе асвячоны біскупам віленскім Юрыем Радзівілам.
Касцёл быў пашкоджаны пад час Вялікай Айчыннай вайны, узарваны ў 1950-я гады. Ад касцёла захавалася толькі засталася частка заходняй сцяны.
Архітэктура[правіць | правіць зыходнік]
.jpg)
Касцёл уяўляў сабой аднанефны, прамавугольны ў плане асноўны аб’ём з пяціграннай апсідай, якія завяршаліся агульным дахам, двухсхільным над асноўным аб’ёмам і шматгранным над алтаром. Да паўночнай сцяны прэсбітэрыя прылягала невялікая двухпавярховая сакрысція, на другім паверсе якой была скарбніца. Сцены былі ўмацаваныя контрфорсамі і завершаныя прафіляваным карнізам. Аконныя праёмы арачныя. Да галоўнага фасада была прыбудаваная трох’ярусная вежа-званіца з арачнымі прамавугольнымі аконнымі праёмамі, упрыгожаная нішамі, філёнгамі, завершаная купалам. Ніжні ярус вежы чацверыковы, астатнія — васьмерыковыя.
.jpg)
Асноўны аб’ём меў цыліндрычнае скляпенне з распалубкамі, у інтэр’еры багата аздобленыя разныя алтары, скульптура. Падлога была цагляная, у асноўным аб’ёме ў ёй было пакладзена некалькі каменных пліт. Пад алтарнай часткай былі сутарэнні. Над уваходам размяшчаліся драўляныя хоры. Сцены касцёлу былі ўзведзеныя ў тэхніцы гатычнай муроўкі з цэглы памерам 26—27 × 12,5—13 × 6,5—7 см.
Зноскі
- ↑ Kleck // Słownik geograficzny Królestwa Polskiego i innych krajów słowiańskich. Tom IV: Kęs — Kutno (польск.). — Warszawa, 1883. — S. 123.
Літаратура[правіць | правіць зыходнік]
- Архітэктура Беларусі: Энцыклапедычны даведнік. — Мн.: БелЭн, 1993. — 620 с. — ISBN 5-85700-078-5.
- Беларуская энцыклапедыя: У 18 т. Т. 8: Канто — Кулі / Рэдкал.: Г. П. Пашкоў і інш. — Мн. : БелЭн, 1999. — Т. 8. — С. 334. — 10 000 экз. — ISBN 985-11-0035-8. — ISBN 985-11-0144-3 (т. 8).
Спасылкі[правіць | правіць зыходнік]
На Вікісховішчы ёсць медыяфайлы па тэме Касцёл Найсвяцейшай Тройцы (Клецк)- Касцёл Найсвяцейшай Тройцы (Клецк) на сайце Radzima.org
- Касцёл Найсвяцейшай Тройцы (Клецк) на сайце Глобус Беларусі (руск.)
