Тутэйшая Шляхта

Тутэйшая Шляхта
Tutejszaja Szlachta
Асноўная інфармацыя
Жанры	фолк / фолк-рок
Гады	1992 — па сённяшні дзень
Краіна	Беларусь
Горад	Мінск
Мова песень	беларуская
tutszlachta.ucoz.com

Тутэйшая Шляхта (Tutejszaja Szlachta) — фальклорны ансамбль, створаны ў 1992 пры Беларускім Дзяржаўным Універсітэце. Складаецца з энтузіястаў, улюблёных у нацыянальную гісторыю і культуру. Творчасць Тутэйшай Шляхты – гэта спалучэнне музычнай спадчыны Вялікага Княства Літоўскага, народных беларускіх песняў і аўтарскіх песняў на словы літвінскіх і беларускіх класікаў у фолк і фолк-рок апрацоўцы.

Народны ансамбль (1992-2011)

Ансамбль Тутэйшая Шляхта (1997)

За час свайго існавання калектыў прымаў удзел у шматлікіх канцэртах, гастраляваў у Польшчы, Германіі, Літве, Латвіі, Эстоніі, Украіне, Расіі. У 2000 ансамблю Тутэйшая Шляхта прысвоена ганаровае званне «Народны», а ў 2013 па адзінагалосным рашэнні журы ансамбль стаў лаўрэатам фестывалю народнай творчасці «Сузор'е», атрымаўшы званне лепшага народнага самадзейнага ансамбля г. Мінска.

Ансамбль пад кіраўніцтвам Лявона Махнача выдаў два музычных зборнікі ў традыцыйнай фальклорнай стылістыцы ў 2001 і 2011 гадах. У сярэдзіне 2000-х дачка заснавальніка ансамбля цымбалістка і кампазітар Тутэйшай Шляхты Вольга Махнач, якая захаплялася рок музыкай, пачала ўносіць у творы ансамбля ноткі фолк-року. Першым эксперыментальным творам у фолк-рок стылістыцы стала песня "Ах, вы, столікі мае", запісаная ў 2006 годзе. Гэты і некалькі іншых фолк-рок запісаў трапілі ў другі зборнік, стаўшы прадвеснікамі новага фолк-рокавага гучання Тутэйшай Шляхты.

Шлях да фолк-року (2012-2015)

У 2011 годзе ў ансамбль у якасці адміністратара і вакаліста прыйшоў Дзяніс Сцяпура, якому выпадкова дала паслухаць запіс "Ах, вы, столікі мае" яго жонка, салістка Тутэйшай Шляхты Марыя Копцель-Сцяпура. Дзяніс, аматар цяжкой рок-музыкі, быў уражаны цікавым спалучэннем року з народным фальклорам і вырашыў стаць удзельнікам Тутэйшай Шляхты, каб разам з Вольгай Махнач развіваць фолк-рок накірунак і папулярызаваць яго ў шырокіх масах. З 2012 году ў рэпертуары ансамбля пачало з'яўляцца ўсё больш твораў, прыпраўленых цяжкімі гітарнымі рыфамі. Ў 2013 годзе пачуўшы новы фолк-рок рэпертуар Тутэйшай Шляхты ў ансамбль вярнуўся гітарыст Сяргей Маісейчык, які прымаў удзел у запісы песні "Ах, вы, столікі мае" ў якасці бас-гітарыста.

У выніку ўтварыўся фолк-рок касцяк з троіцы Вольга Махнач / Дзяніс Сцяпура / Сяргей Маісейчык, які распачаў падрыхтоўку да запісу дэбютнага фолк-рок альбому Тутэйшай Шляхты пад назвай "Сармацкі рок". Студыйны запіс стартаваў у 2014 годзе, першыя 2 творы былі прэзэнтаваныя ў канцы года і былі вельмі цёпла ўспрынятыя публікай, песня "Каляда-Калядзіца" трапіла ў рэпертуар беларускамоўнага "Радыё Сталіца". Да сярэдзіны 2015 года была падрыхтаваная дэма-версія альбому з 6-ці твораў, песня "Сэрца ў роспачы ня плача" стала лепшай песняй жніўня на "Радыё Сталіца", ансамбль выйшаў з ценю беларускай музычнай сцэны і займеў шмат новых прыхільнікаў. Фолк-рок накірунку стала цесна ў межах народнага ансамбля і ў канцы 2015 году паўстало пытанне пра стварэнне асобнага гурта, які б выконваў фолк-рок рэпертуар. Але з-за арганізацыйных, тэхнічных і фінансавых цяжкасцяў асобны фолк-рок гурт так і ня быў створаны.

Студыйны фолк-рок праект "TŠ" (2016-2019)

У пачатку 2016 году Сяргей Маісейчык пакінуў ансамбль, а Дзяніс Сцяпура вылучыў фолк-рок накірунак Тутэйшай Шляхты ў асобны студыйны фолк-рок сайд-праект "TŠ". Запіс альбому "Сармацкі рок" аднавіўся, але ішоў марудна. Цягам 2016-2017 гадоў былі дазапісаныя некалькі песняў у дэбютны альбом, і запісаныя некалькі сінглаў. Песня "Імжа" стала яшчэ адным хітом Тутэйшай Шляхты. Летам 2017 года Дзяніс Сцяпура пакінуў ансамбль і засярэдзіўся на адміністраванні сайд-праекту "TŠ". У канцы 2017 году было выдадзена невялікае адгалінаванне будучага паўнафарматнага альбому — міні-альбом "Зорка Крэва". Тры песні з міні-альбому трапілі ў рэпертуар "Радыё Сталіца". У 2018 годзе запіс альбому "Сармацкі рок" быў скончаны, ў 2019 годзе адбыўся яго рэліз, у гэтым жа годзе альбом перамог у восеньскім чарце буйнога музычнага парталу беларускай музыкі "TuzinFM".

Тутэйшая Шляхта сёння

У дадзены момант Тутэйшая Шляхта ўяўляе сабой: 1) народны ансамбль БДУ, 2) студыйны фолк-рок сайд-праект "TŠ", які складаецца як з некаторых удзельнікаў ансамбля, так і з сесійных удзельнікаў, якія прымаюць удзел толькі ў запісах. Галоўны мужчынскі вакал праекта "TŠ" — Андрэй Сцяпанаў, адну з песняў выконвае адміністратар праекту Дзяніс Сцяпура, жаночы вакал падзелены на два падпраекты: "Зорка Крэва" з салісткай Анастасіяй Сенько і сімфа-рок трыо "AnnaMaria" з вядучым вакалам Марыі Копцель-Сцяпуры. Многія кампазіцыі праекту "TŠ" можна пачуць у акустычнай версіі ў выкананні народнага ансамбля. Зрэдку ансамбль дае электрычныя канцэрты, дзе творы студыйнага праекту "TŠ" можна пачуць у арыгінале.

На 2020 год праектам "TŠ" запланаваны рэліз сімфа-рок альбому "AnnaMaria" і фолк-рок альбому з мужчынскім вакалам на старажытнавайсковую тэматыку.

Дыскаграфія (ансамбль)

Зборнікі

• Першы альбом (2001)
• Другі альбом (2011)

Дыскаграфія (фолк-рок праект "TŠ")

Альбомы

• Зорка Крэва (2017) EP
• Сармацкі рок (2019) LP

Удзельнікі (ансамбль)

• Лявон Махнач — мастацкі кіраўнік, адміністратар
• Вольга Махнач — лідар ансамбля, хормайстар, адміністратар, цымбалы, кампазітар
• студэнты і выпускнікі БДУ

Удзельнікі (фолк-рок праект "TŠ")

• Дзяніс Сцяпура — адміністратар, прадусар, бэк-вакал, вакал
• Вольга Махнач — кампазітар, цымбалы, бэк-вакал
• Андрэй Сцяпанаў — вакал, бэк-вакал, духавыя інструменты
• Марыя Копцель-Сцяпура — вакал, бэк-вакал, дызайнер
• Анастасія Сенько — вакал, бэк-вакал
• Андрэй Анціпенка — духавыя інструменты
• Альгерд Грышчанка — клавішныя інструменты
• Ягор Дзыгун — электрычная і акустычная гітара
• Сергей Кунцэвіч — бас-гітара
• Андрэй Маўрын — ударныя інструменты
• Ганна Суворава — бэк-вакал
• Валянціна Захарыч — бэк-вакал
• Іншыя ўдзельнікі

Цікавыя факты

• Ніводзін з чатырох салістаў "TŠ" ня мае вакальнай музычнай адукацыі
• Родная цётка стваральніка ансамбля Лявона Махнача з'яўляецца жонкай Кандрата Крапівы
• Усе музычныя аранжыроўкі праекту "TŠ" напісаныя дачкой стваральніка ансамбля цымбалісткай Вольгай Махнач
• Сын Вольгі Махнач клавішнік Альгерд Грышчанка прымае ўдзел у запісах "TŠ" з 11-гадовага ўзросту
• Адміністратар і вакаліст "TŠ" Дзяніс Сцяпура — капітан міліцыі ў запасе
• Запіс альбома "Сармацкі рок" пачаўся з песні "Ня журыся, хлапеча", але яе дэма-версія была адбракаваная ўдзельнікамі запісу. Песня была перазапісаная і апублікаваная праз 5 гадоў ужо пасля рэлізу альбому.
• Аўтар гербу Тутэйшай Шляхты, які размешчаны на вокладцы альбому "Сармацкі рок" — Дзяніс Сцяпура
• Аўтар лагатыпу Тутэйшай Шляхты — Лявон Махнач
• Першыя 5 гадоў свайго існавання ансамбль ня меў уласных шляхецкіх касцюмаў і быў вымушаны выступаць у пазычаных народных касцюмах
• Праект "TŠ" не назапашвае матэрыял для альбому, а вядзе студыйную працу безперапынна і публікуе запісы паводле канцэпцыі "адзін сінгл у некалькі месяцаў", таму на момант выхаду альбому амаль усе кампазіцыі з яго ўжо вядомыя слухачам.

Спасылкі

• Ансамбль Vkontakte
• Ансамбль Facebook
• Ансамбль Instagram
• Ансамбль Youtube
• Ансамбль на сайце БДУ
• Афіцыйны сайт ансамбля
• Фолк-рок праект "TŠ" Vkontakte
• Фолк-рок праект "TŠ" Facebook
• Фолк-рок праект "TŠ" Youtube
• Фолк-рок праект "TŠ" Soundcloud