Тэатр Сарвера
Тэатр Сарвера — найбуйнейшы кінатэатр і канцэртная зала Брэста першай паловы ХХ стагоддзя.
Знаходзіўся на Тэатральнай вуліцы (цяпер вул. Свярдлова) у будынку, які яўрэйскі прадпрымальнік Абрам Сарвер узвёў на ўласным пляцы ў пачатку ХХ стагоддзя. Спярша зала функцыянавала як кінатэатр «Лотас». У міжваенны час установа стала называцца па прозвішчы ўласніка. Кіраўніцтва тэатрам пераняў сын Міхаіл Сарвер.
Зала была найбуйнейшай у міжваенным Брэсце, змяшчала амаль 500 гледачоў. Дзейнічала не толькі як кінатэатр, але і як уласна тэатр, канцэртная зала, у прыватнасці, арэндавалася для яўрэйскіх і ўкраінскіх культурных мерапрыемстваў[1].
У пачатку верасня 1939 года у кінатэатры зрабілі штаб камсамольцы і падпольшчыкі КПЗБ.
Уласнік Міхаіл Сарвер, паводле адной версіі, перажыў вайну, эвакуіраваўшыся разам з філармоніяй. Паводле другой, быў зняволены савецкай уладай. Вярнуўшыся ў Брэст, жыў у будынку былога ўласнага кінатэатра (пасля вайны — кінатэатры імя Горкага)[2]. Працаваў метадыстам у Доме народнай творчасці Брэста.
У будынку былога тэатра Сарвера цяпер знаходзіцца 2-і вучэбны корпус Брэсцкага дзяржаўнага гандлёва-тэхналагічнага каледжа і кавярня «Роднік»[3].
Крыніцы
[правіць | правіць зыходнік]- ↑ Театр Сарвера в Бресте-над-Бугом (руск.). www.realbrest.by. Праверана 20 лістапада 2025.
- ↑ Наследие Бриска - Михаил Сарвер и кинотеатр Сарвера . sites.google.com. Праверана 20 лістапада 2025.
- ↑ Где 100 лет назад в Бресте находился самый большой зрительный зал. Новости Бреста и Брестской области сегодня | БрестСИТИ (8 жніўня 2020). Праверана 20 лістапада 2025.